ବନ୍ଦେ ପ୍ରଭୁ ସୋମନାଥ

     ବନ୍ଦେ ପ୍ରଭୁ ସୋମନାଥ       
       ============
ବନ୍ଦେ ପ୍ରଭୁ ସୋମନାଥ
            ଆଜି ସୋମ ବାରେ l
ବିରାଜିଛ ପ୍ରଭୁ ପଶ୍ଚିମ
                  ସାଗର ତୀରେ ll
ବାରଗୋଟି ଜ୍ୟୋତିର୍ଲିଙ୍ଗ
                ଭାରତେ ବିଖ୍ୟାତ l
ତା ମଧ୍ୟେ ବିଖ୍ୟାତ ଅତି
                 ପ୍ରଭୁ ସୋମନାଥ ll
ଶୁଣିଛି ମୁଁ ପୁରାଣରେ
                  ଆଖ୍ୟାନ ଏମନ୍ତ l
ଗୁରୁ ପତ୍ନୀ ହରି ଚନ୍ଦ୍ର
              ହେଲେ ବ୍ୟାଧିଗ୍ରସ୍ତ ll
ବ୍ୟାଧି ମୁକ୍ତି ପାଇଁ ବୁଲି
                ହୋଇଲେ ବିବସ l
ତୁମ୍ଭରେ ଶରଣ ଗଲେ
             ଶେଷେ ଆଶୁତୋଷ ll
ତୁମ୍ଭେ ପ୍ରଭୁ ଦୟାମୟ
                 ଆଶୁ ଫଳ ଦାତା l
ଦୟା ବହି ଚନ୍ଦ୍ରଙ୍କର
                   ହରିଲ ହିନସ୍ଥା ll
ଚନ୍ଦନ କାଷ୍ଠରେ ଗଢ଼ି
                     ସୁନ୍ଦର ମନ୍ଦିର l
ଆଶ୍ରୟ ଲୋଡ଼ିଲେ ତହିଁ
                 ରୋହିଣୀଙ୍କ ବର ll
ପ୍ରଭାଯୁକ୍ତ ହେଲେ ପୁଣି
                  ଯେଣୁ ତାରାନାଥ l
ପ୍ରସିଦ୍ଧ ହୋଇଲା ତେଣୁ
                 ଏ ପ୍ରଭାସ କ୍ଷେତ୍ର ll
ସୋମଙ୍କର ଶାପ ଯହୁଁ
                    ଗଲା ତହିଁ କ୍ଷୟ l
ବୋଲାଉଛ ସୋମନାଥ
                 ଆହେ ଦୟାମୟ ll
ଇତିହାସେ ଦେଖି ଅଛ
                  କେତେ ଘନଘଟା l
ଲୋମ ହର୍ଷକ ସେ କ୍ରୁର
                    ମାମୁଦର କଥା ll
ଖଣ୍ଡ ଖଣ୍ଡ କଲା ଲିଙ୍ଗ
                    ଦେଉଳ ଲୁଣ୍ଠିଲା l
ସେବକଙ୍କ ମୁଣ୍ଡ କାଟି
                  ରକ୍ତେ ସ୍ନାନ କଲା ll
ତୁମ୍ଭେ ହେ ସତ୍ୟ ସୁନ୍ଦର
                    ପ୍ରଭୋ ଅବିନାଶି l
ଉତ୍ତୁଙ୍ଗ ଦେଉଳେ ଅଛ
                    ସତ୍ୟକୁ ପ୍ରକାଶି ll
ଅକର୍ମ କର୍ମ ଦାୟକ
                     ଆହେ ଶୂଳଧର l
ପ୍ରଭୁ ଉମାକାନ୍ତ ତବ
                     ମହିମା ଅପାର ll
ଭାରତ ବକ୍ଷେ ଉଡୁଛି
                     ତବ ଦିବ୍ୟ ଧ୍ଵଜା l
ଦୁଃଖୀ ଆର୍ତ୍ତି କରୁଛନ୍ତି
                    ତୁମ୍ଭ ନିତ୍ୟ ପୂଜା ll
ଆଶିଷ ଦେଉଛ ବାଣ୍ଟି
                      ବସି ସିନ୍ଧୁ ତଟେ l
ନମସ୍ତେ ନମସ୍ତେ ଦେବ
                   ନମଃ ନୀଳକଣ୍ଠେ ll
ଦେବ ଦେବ ମହାଦେବ
                    ପ୍ରଭୋ ଦୁଃଖହର l
ଶ୍ରୀସୋମ ନାଥଙ୍କୁ କରେ
                   କୋଟି ନମସ୍କାର ll
            🙏🙏🙏
                ଅର୍ଜୁନୀ
              -------------
ଅର୍ଜୁନୀ ଚରଣ ବେହେରା
ମୋ - ୭୬୯୩୦୯୧୯୭୧