ବିଦଗ୍ଧ ଜୀବନେ

ପ୍ରିୟର ଆସିବା ଖବର ଶ୍ରବଣେ

ଜାଗିଛି ପୀରତି ପ୍ରେୟସୀର ମନେ

ଫୁଟିଛି କୁସୁମ ହୃଦ ଉପବନେ

ଥରୁଅଛି ଛାତି ମୃଦୁ ଶିହରଣେ ।

ସଜାଇ ହୋଇଛି ନାନା ଆଭୂଷଣେ

ବେନି ହସ୍ତ ଶୋହେ ସୁବର୍ଣ୍ଣ କଙ୍କଣେ

କେଶର ଗଭାକୁ ବାନ୍ଧିଛି ଯତନେ

ନାଇଛି କୁଣ୍ଡଳ ପ୍ରିୟା ଦୁଇ କର୍ଣ୍ଣେ ।

ଆଖି ଝଲସୁଛି  ମଧୁର ସପନେ

ଭ୍ରମୁଛି ତରୁଣୀ ଏକା ଯଉବନେ

ଜଳୁଛି ପରାଣ ବିରହ ଦହନେ

ଖୋଜୁଥିଲା ସାଥି ପରଶ ଫଗୁଣେ ।

ନିସ୍ତବ୍ଧ ରାତ୍ରିରେ ଚନ୍ଦ୍ରମା କିରଣେ

ଲେଖିଥିଲା ଚିଠି ମାନସୀ ଗୋପନେ

ବିଳମ୍ବ ନକରି ଫେରିବ ତକ୍ଷଣେ

ଭରିଦେଵ ତୃପ୍ତି ତୃଷିତ ପରାଣେ ।

ଆସିବେ ନାଗର ଆଜି ଶୁଭଦିନେ

ସ୍ମିତହାସ୍ୟ ଖେଳେ ସୁନ୍ଦରୀ ବଦନେ

କଣେଇ ଚାହୁଁଚି ମିଠା ଅଭିମାନେ

ତୋଳିନେବେ କୋଳେ କିବା ଆଲିଙ୍ଗନେ ।

କରିନେବେ ବଶ ମଧୁର ଚୁମ୍ବନେ

ତେଜିବି ସକଳ ଲଜ୍ଜ୍ୟା କି ନିର୍ଜନେ

ରଚିବେ କି ଗୀତି ପୀରତି ମିଳନେ

ନାଶି ଅବଶୋଷ ବିଦଗ୍ଧ ଜୀବନେ ।