ଭସ୍ମ ଭୂଷଣ
ଭସ୍ମ ଭୂଷଣ
ଶିବ ହେ ! ମୋର ପ୍ରଣତି ଘେନ
ଶିବ ଶିବ ବୋଲି ଯାଉ ଜୀବନ l
ତୁମ୍ଭେ ସତ୍ୟ ଶିବ ସୁନ୍ଦର ଜଗତେ
ସତ୍ୟ ଲାଗି କଲ ଗରଳ ପାନ ll
ଆହେ ନୀଳକଣ୍ଠ ଫେଡ଼ ମୋ ଅରିଷ୍ଟ
ଦିଗମ୍ବର ଆହେ ବାସ ସ୍ମଶାନ l
କଇଳାସ ପତି ହର ମୋ ବିପତ୍ତି
ସଦାଶିବ ହର ତିନି ଲୋଚନ ll
ବୃଷଭ ଆରୋହୀ ସର୍ବ ମୋକ୍ଷଦାୟୀ
ଉମାପତି ଆହେ ନନ୍ଦୀ ବାହନ l
ପଞ୍ଚାମୃତ ପାୟୀ କୋଳେ ମହାମାୟୀ
ଶୂଳ ପାଣି ଆହେ ପଞ୍ଚ ଆନନ ll
ପତ୍ର ନ ଭକ୍ଷିଲେ ତୁମ୍ଭଙ୍କୁ ଲଭିଲେ
ହିମାଳୟ ଜେମା ପକାଇ ରାଣ l
ଦେବ ସେନାପତି ତୁମ୍ଭର ସନ୍ତତି
ବିଦ୍ୟା ଦାତା ପ୍ରଭୁ ଗଜ ବଦନ ll
ପ୍ରଭୁ ଆଶୁତୋଷ ଅଳପେ ସନ୍ତୋଷ
ବିଷ୍ଣୁ କଲେ ତୁମ୍ଭ ପଦ ବନ୍ଦନ l
ତ୍ରେତୟାରେ ପୁଣି ତୁମ୍ଭ ନାମ ଗୁଣି
ସେତୁ ବନ୍ଧାଇଲେ ଶ୍ରୀରଘୁ ରାଣ ll
କାଶୀପୁର ବାସୀ ହେ ଚିର ସନ୍ନ୍ୟାସୀ
ମହାଯୋଗୀ ମାଗି କଲ ଭୋଜନ l
ମାତା ଅନ୍ନପୂର୍ଣ୍ଣା ପାର୍ବତୀ ଅପର୍ଣ୍ଣା
ଭିକ୍ଷା ପାତ୍ର କଲେ ତୁମ୍ଭର ପୂର୍ଣ୍ଣ ll
ଅରଖ ଗୟସ ହେ ପ୍ରଭୁ ଗିରିଶ
ଧାତୁରା କେତକୀ ଭଷ୍ମ ଭୂଷଣ l
ଆହେ ଗଙ୍ଗାଧର ଅହି ଗଳେ ହାର
ସଦାଶିବ ହର ସର୍ବ ଦୂଷଣ ll
ହେ ପ୍ରଭୁ ମହେଶ କ୍ଷମ ମୋର ଦୋଷ
ପଦେ ତୋର ପ୍ରଭୁ ଗଲି ଶରଣ l
ଆହେ ଭୁତପତି ପ୍ରଭୁ ମହାଯତି
ମହେଶ୍ୱର ଆହେ ଶଙ୍କର ଶୁଣ ll
ଶିବ ହେ ! ମୋର ପ୍ରଣତି ଘେନ
ଶିବ ହେ ! ମୋର ପ୍ରଣତି ଘେନ !!!
