ଭଲଲୋକ : ଡକ୍ଟର କୃତ୍ତିବାସ ନାୟକ

ଭଲଲୋକ ସହ ସଂଯୋଗ ହୋଇବା ସୁଖ-ସୌଭାଗ୍ୟର କଥା,

ମନ୍ଦଲୋକ ସହ ଭେଟିବା ଦୁର୍ଭାଗ୍ୟ ମିଳେ ଅପମାନ ବ୍ୟଥା |

ଶାରୀରିକ କିବା ମାନସିକ ଭାବେ କାହାକୁ ଆହତ କଲେ,

ପାପବୋଲି ତାକୁ ଶାସ୍ତ୍ର କହିଥାଏ ଅନୁତାପ ଫଳ ମିଳେ |

ପ୍ରିୟ ବା ଅପ୍ରିୟ ଲୋକପାଇଁ ଯଦି କରିଥାଉଁ ଉପକାର,

ତାକୁ ପୁଣ୍ୟ ବୋଲି ଶାସ୍ତ୍ର କହେ ପୁଣି ସହାୟ ହେବେ ଈଶ୍ଵର |

ପୁରୁଣା ଚିଜକୁ ନ ଛାଡ଼ି ନୂଆକୁ କେହି ପାରିନାହିଁ ଧରି,

ନୂଆ ଭାବ-ଭାଷା ଆସିବ କେମିତି ପୁରୁଣାକୁ ହେଲେ ଝୁରି ?

ପୁରୁଣା ପୋଷାକ ଆମ ପ୍ରତିଭାକୁ ପ୍ରଭାବିତ କରେନାହିଁ,

ପୁରୁଣା ବନ୍ଧୁ ଯେ ଯେଉଁଠି ଥିଲେ ବି ବିପଦରେ ଖୋଜେ ସେହି |

ପୁରୁଣା ହେଲେ ବି ବାପା-ମାଆ କେବେ ପିଲାଙ୍କୁ ଭୁଲନ୍ତି ନାହିଁ,

ସରଳ ଜୀବନ ସଫଳତା ପଥେ ଅନ୍ତରାୟ ହୁଏନାହିଁ |

ଆମେ ଯେଉଁ କାର୍ଯ୍ୟ କରୁଛୁ ତାହାକୁ ଅନ୍ୟ ବି ପାରିବେ କରି,

ଯେତେ ଚେଷ୍ଟା କଲେ ଅନୁକରଣରେ ହେବେନାହିଁ ଆମପରି |