ଭଲ ପାଅ ଯଦି

ଭଲ ପାଅ ଯଦି ହୃଦୟରେ ଲେଖିଦିଅ ଅଲିଭା ଅକ୍ଷର,

ସବୁ ଦିନ ରହିଯିବ ଏଠି ତୁମର ସେ ସବୁଜ ସ୍ୱାକ୍ଷର ।

ଭଲ ପାଅ ଯଦି କହିଦିଅ ଖୋଲାଖୋଲି ମନ କଥା ଆଜି,

ସବୁ କିଛି ଛାଡି ଦେଇ ମୁହିଁ ତୁମ ପ୍ରେମେ ଯିବି ମୁହିଁ ଭିଜି ।

ହଜି ଯିବି ଭିଜି ଯିବି ମୁହିଁ ପ୍ରେମ ମୋତେ କରିବାକୁ ଦିଅ,

ମଉନରେ ତୁମେ କେତେ ଆଉ ପରଦାରେ ଲୁଚି ଲୁଚି ଚାହଁ ।

ଏଇମିତି ମନ କଥା ମନେ କେତେ ଦିନ ଲୁଚାଇ ରଖିବ,

ନିରବରେ ରହି ଖାଲି ଏକା ହୃଦୟକୁ କଷ୍ଟ ଦେଉଥିବ ।

ହୃଦୟକୁ କଷ୍ଟ ଦେଲେ ସିଏ କେତେ ଦିନ ସମ୍ଭାଳି ରଖିବ,

ଅଯଥାରେ ତୁମ ମନ ପୁଣି କହିବାକୁ ହାଇଁ ପାଇଁ ହେବ ।

ଭଲ ପାଏ ଯିଏ ସିଏ ବୁଝେ ସହଜରେ ଭାଷା ନୟନର,

କହି ଦିଅ କର ନାହିଁ ଡେରି ମନ ମୋର ହେଉଛି ଅସ୍ଥିର ।

****