ଭଲ ମଣିଷଟେ ହେବା

ଦୁନିଆ ବୁକୁରେ ଭଲ କାମ କରି

ଯେବେ ଯଶ ଅରଜିବା

ସବୁରି ପାଖରେ ନିଶ୍ଚୟ ଆମେରେ

ଭଲ ମଣିଷଟେ ହେବା ।

ବାଳକ ବେଳରୁ ବୁଝି ଏହି କଥା

କର୍ତ୍ତବ୍ୟରେ ଆଗେଇବା

ପିତାମାତାଙ୍କର କଥା ମାନି ଚଳି

ଭଲ ମଣିଷଟେ ହେବା ।

ଵଡ଼ଙ୍କୁ ସମ୍ମାନ ସାନକୁ ଆଦର

ନମ୍ରତା ଗୁଣେ କରିବା

ମିଠା ଶବଦରେ ମନ ମୋହି ନେଇ

ଭଲ ମଣିଷଟେ ହେବା ।

ଗୁରୁଙ୍କର ନୀତି ଆଦରଶ ପଥ

ଅନ୍ତରେ ଆପଣେଇବା

ଆଶୀର୍ବାଦ ହାତ ମଥା ପରେ ଥିବ

ଭଲ ମଣିଷଟେ ହେବା ।

ସୁଶିକ୍ଷା ସଂସ୍କାର ଯେତେ ସଦାଚାର

ସେଥିରେ ପଖାଳି ହେବା

ଈଶ୍ବରଙ୍କଠାରେ ହୋଇ ଭକ୍ତିମତି

ଭଲ ମଣିଷଟେ ହେବା ।

ସ୍ନେହ, ପ୍ରେମ, ଦୟା, କ୍ଷମାକୁ ଆଦରି

ଜୀବନକୁ ଗଢୁଥିବା

ନିଜକୁ ଆନର ହୃଦୟରେ ଥାପି

ଭଲ ମଣିଷଟେ ହେବା ।

ଶାନ୍ତ ସୁଢ଼ଳ ଧଇର୍ଯ୍ୟ ପ୍ରବଳ

ଉଦାରତାକୁ ଧରିବା

ସଫା କରି ନିଜ ମନରୁ ମଇଳା

ଭଲ ମଣିଷଟେ ହେବା ।

ଅସହାୟ, ଦୀନ, ଦୁଃଖୀର ସେବାରେ

ମନ ସଦା ନିବେଶିବା

ସେମାନଙ୍କ ମୁଖେ ହସ ଟିକେ ଦେଇ

ଭଲ ମଣିଷଟେ ହେବା ।

ରାଗ, ରୋଷ, ଈର୍ଷା, ଅସୂୟା, ବିଦ୍ବେଷ

ହିଂସା ଆନେ ନ ରଖିବା

ଆପଣାପଣର ମହକ ଛୁଟଇ

ଭଲ ମଣିଷଟେ ହେବା ।

କାହା ଦୋଷ କେବେ ନଦେଖି ଆଖିରେ

ଭଲ ପରଖି କହିବା

ସଂଶୋଧନ ପାଇଁ ତା'ଠି ବଳ ଭରି

ଭଲ ମଣିଷଟେ ହେବା ।

ଜ୍ଞାତି ପରିଜନ ବନ୍ଧୁବାନ୍ଧବଠୁ

ଦେଶେ ଆମେ ଯେତେ ଥିବା

ନିଜ ଅବା ପର ଭାବନା ନରଖି

ଭଲ ମଣିଷଟେ ହେବା ।

ପ୍ରେମ ସଦ୍ଭାବନା କରି ମୂଳମନ୍ତ୍ର

ହୃଦୁ ହୃଦ ଜିତୁଥିବା

ପ୍ରତିଧ୍ବନି ହେବ ମଙ୍ଗଳଦାୟକ

ଭଲ ମଣିଷଟେ ହେବା ।

ଜ୍ଞାନକୁ ଆହରି ଅପରକୁ ବାଣ୍ଟି

ଜ୍ଞାନାଲୋକ ଜଳାଇବା

ଅଜ୍ଞାନାନ୍ଧାର କରିଦେଇ ଦୂର

ଭଲ ମଣିଷଟେ ହେବା ।

ଯେଉଁଠିକୁ ଯିବା ସେ ପରିବେଶରେ

ସ୍ବଚ୍ଛତାକୁ ଧ୍ୟାନ ଦେବା

ସ୍ବାସ୍ଥ୍ୟ ପ୍ରତି ଯତ୍ନଶୀଳ କରାଇଣ

ଭଲ ମଣିଷଟେ ହେବା ।

ସୁସ୍ଥ ପାବନ ମନଟିଏ ଧରି

ନିତି ଚଳି ଯାଉଥିବା

ଅପର ଖୁସିରେ ନିଜେ ହୋଇ ଖୁସି

ଭଲ ମଣିଷଟେ ହେବା ।

ଭଲ ମଣିଷରୁ ବଡ଼ ମଣିଷଟେ

ଯବେ କିଏ ସେ ହୋଇବା

ଜଗତେ ନିଶ୍ଚୟ କରି ନାମୋଜ୍ଜ୍ବଳ

ଅମର କୀର୍ତ୍ତି ରଚିବା ।