ଭକତି ଲୁହ

ଖାଲି ହାତେ କେହି ତୁମରି ଦୁଆରୁ

ଯାଇନାହିଁ କେବେ ଫେରି

ଏତେ ବଡ ସତ୍ୟ ବିଶ୍ଵାସ ହୁଏନି

ମନ ଆମର ଏପରି

ବିଶ୍ଵ ବ୍ରହ୍ମାଣ୍ଡର ଯିଏ ଅଧୀଶ୍ଵର

ଯା ପାଖେ ସବୁ ବିଭବ

କାହା ପାଇଁ ସିଏ ଏ ସବୁ ରଖିଛି

କାହାକୁ ସେ ଅବା ଦେବ?

ଦେବା ନେବା ଯଦି ବିଶ୍ଵର ନିୟମ

ଦେବାକୁ ତ କିଛି ହେବ

ମାଗିବାକୁ ଯଦି ଇଚ୍ଛା କରୁଅଛ

ଦେବା କଥା କିଛି ଭାବ

ଭକତି ଚିତ୍ତରେ ଆଖି ଲୁହ ଦେଇ

ପାଦ ତାର ଧୋଇ ଦିଅ

ଏତିକି ମାତର ଦେଇଦିଅ ତାକୁ

ମନ ଇଚ୍ଛା ମାଗିନିଅ

ଚିତ୍ତରଞ୍ଜନ ଲେଙ୍କା,କଟକ