ଭାଉଜଙ୍କ ପାଇଁ ପଦେ
ଭାଉଜଙ୍କ ପାଇଁ ପଦେ
କେଉଁ ରୂପ ନେଇ ଫୁଲେଇ ହେଉଛ
କୁହ ହେ ଭାଉଜ ମୋର
କେଉଁ ଧନ ପାଇଁ ହେଉଛ ବ୍ୟାକୁଳ
ରହୁନାହିଁ ଥଳକୂଳ ।
ସୁନ୍ଦର ଶରୀର ପାଇଗଲ ବୋଲି
ନିଜକୁ ଭାବୁଛ ଶ୍ରେଷ୍ଠ
ଗୁରୁଜନ ମୁଖେ ଜବାବ ଦେଉଛ
ନିଇତି ଖୋଜୁଛ ନୋଟ ।
ରହି ନାହିଁ କେବେ ରହିବ ନାହିଁ ହେ
ଯାହା ସବୁ ଅଛି ଆଜି
ନୂଆ ଦିନେ ଆଜ୍ଞା ହୋଇବ ପୁରୁଣା
କେମିତି ଦଉଚି ହେଜି ।
କଥାରେ କଥାରେ କନ୍ଦେଇ ଦେଉଛ
ରଖୁନ ମାନ ମହତ
କେଉଁ ଘର ଝିଅ କି ଶିକ୍ଷା ପାଇଛ
ମିଛକୁ କରୁଛ ସତ ।
ଆମ ଶାଗ ପଖାଳ ବଡ଼ ଆମକୁ
ଦୁଃଖକୁ ଭାବିଛୁ ସୁଖ
ଆମରି ଘର ଅଟେ ଭାବର ମନ୍ଦିର
ମନେ ନାହିଁ କେବେ ଦୁଃଖ ।
ତମ ପାଦ ଦୁଇ ପଡିଲା ଦିନଠୁ
ଲାଗୁଅଛି ଅସ୍ତ ବେସ୍ତ
ବନ୍ଧୁ ପ୍ରିୟ ଜନ ଭୁଲିତ ଯାଇଛୁ
ମୁଖେ ନାହିଁ ଟିକେ ହସ ।
ନାରୀ ହୋଇ ତମେ କେମିତି ବୁଝୁନ
ସ୍ନେହ ଶ୍ରଦ୍ଧା ଆଉ ପ୍ରେମ
କ୍ରୋଧରେ ଜଳୁଛ ହିଂସାରେ ସିଝୁଛ
ପାଲଟିଛ ପାପୀ ସମ ।
ବେଳ ଥାଉ ଥାଉ ସୁଧୁରି ଯାଅ ହେ
ଶାନ୍ତିରେ କଟିବ ଦିନ
କାହାକୁ ଠକୁଛ ଚିନ୍ତା କର ଆଗ
ବୁଝିଯିବ ତମ ମନ ।
କିଛି ଲାଭ ନାହିଁ ଜର୍ଜରିତ ହୋଇ
ପ୍ରଭୁଙ୍କର ନାମ ଜପ
ସଂସାର ପଥରେ ପଥିକଟେ ହୋଇ
ସୁକର୍ମେରେ ପାଦ ଥାପ ।
ଆସିଅଛେ ଏକା ଯିବା ଆମେ ଏକା
ଯିବେ ନାହିଁ ଆଉ କେହି
ଯେତେ ଦିନ ଯାଏ ଥିବ ଏହି ପ୍ରାଣ
ହସିପାରିବାନି କାହିଁ ।
ଘରକୁ ଭାବିବା ମନ୍ଦିର ପରିକା
ଗୁରୁଜନ ଦେବା ଦେବୀ
ହୃଦ ପୁଷ୍ପ ଦେଇ ସ୍ନେହ ଚନ୍ଦନରେ
ପୂଜିବା ଭକ୍ତିର ଅର୍ଘ୍ୟ ସମର୍ପି l