ବେଶି ଭଲଲାଗେ

ମୋତେ ବେଶି ଭଲ ଲାଗେ

ତୁମର ସେ ନରମ ଚାହାଁଣି

ଆଉ ଅଳ୍ପ ଅଳ୍ପ ହସ ,

ତା'ଠୁ ବେଶି ଭଲ ଲାଗେ

ତୁମର ସେ ମିଠା ମିଠା କଥା

ଆଉ ପ୍ରେମବୋଳା ସ୍ପର୍ଶ ।

ତୁମେ ତ ଆଉ କେହି ନୁହଁ

ମୋ ସ୍ମୃତି ବଗିଚାର 

ଚାରା ଗଛଟିଏ ,

ମୁଁ କିନ୍ତୁ ତୁମ ପାଇଁ

ସଦ୍ୟ ଫୁଟା

ଗୋଲାପ କଢ଼ିଟିଏ ।

ତୁମେ ମୋ ସ୍ମୃତିର 

ଅଲିଭା ଦାଗ

ମୋ ସ୍ମୃତି ଆକାଶର ,

ତୁମେ ଏକ ମୁକ୍ତ ବିହଙ୍ଗ

ମୋ ସ୍ୱପ୍ନ

ରାଜ ପ୍ରାସାଦର ।

ତୁମେ ମୋ ସ୍ୱପ୍ନ ନାୟକ

ମୋ ରକ୍ତାଭ

ଜୀବନର , 

ତୁମେ ପରା ମୋ 

କାବ୍ୟ ନାୟକ

ମୋ ଜୀବନ ଅଖଣ୍ଡ କାବ୍ୟର ।

ତୁମେ ମୋ କାନଭାସର ଫର୍ଦ୍ଦ

ମୋ ସ୍ମୃତି

ରାଇଜର ,

ମୋ ପାଇଁ ତୁମେ କିନ୍ତୁ

ଆଶା ଓ ଆଶଙ୍କାର

ସୁନୀଳ ସାଗର ।

ଏହିଭଳି ଅନେକ ରାତି

ଖାଲି ମୋ

ସ୍ୱପ୍ନରେ ବିତିଗଲା ,

ଏହିଭଳି ସ୍ମୃତିର ଅନେକ ଦୁଃଖ

ଆଜି ହସରେ

ଭଟ୍ଟା ପଡ଼ିଗଲା ।

ଏବେ ଏଭଳି ରାତି

ଦୁଃଖରେ

ପାହାଡ଼ ପାଲଟିଛି ,

ଏଭଳି ଅନେକ ମୁହୂର୍ତ୍ତ

ହସକୁ ଅପେକ୍ଷା କରି

କେଉଁଠି ବା ଅଟକି ଯାଇଛି ?

ତଥାପି ଭଲ ଲାଗେ

ଭାବିବାକୁ

ନିରୋଳା ରାତ୍ରୀରେ ,

ଚାହେଁ ମୁଁ ହଜି ଯିବାକୁ

ତୁମର ସେ

ନରମ ଚାହାଁଣୀରେ ।