ବେଣୁ କେ ଦେଲା ତୋତେ

କୃଷ୍ଣ ହେ ବେଣୁ କେ ଦେଲା ତୋତେ,

  ରାଧା ରାଧା ଡାକୁଥାଇ ନିଶିଥେ,

କୃଷ୍ଣ ହେ ବେଣୁ କେ ଦେଲା ତୋତେ l

  ଯମୁନାର ପାଣି ବହେ ଉଜାଣି,

ବାୟାଣୀ ହୋଇଲେ ଗୋପ ତରୁଣୀ,

  କୂଳ ମାନ ତେଜି ଧାଇଁ ସମସ୍ତେ,

କୃଷ୍ଣ ହେ ବେଣୁ କେ ଦେଲା ତୋତେ l

ଥକିତ ହୋଇଲେ କୁରଙ୍ଗୀ, କେକା,

  କାକ ପିକ ଶୁକ ହଂସ ଶାରିକା,

  ତେଣୁ ବେଣୁ ମୁଁ ନଯାଇ ପରତେ,

କୃଷ୍ଣ ହେ ବେଣୁ କେ ଦେଲା ତୋତେ l

   କୂଳଛଡ଼ା ବେଣୁ କୂଳ ଛଡ଼ାଇ,

  ବୃନ୍ଦାବନେ ଗଲୁ ଧେନୁ ଚରାଇ,

କୂଳଟା ହୋଇଲେ ଗୋପୀ ସମସ୍ତେ,

କୃଷ୍ଣ ହେ ବେଣୁ କେ ଦେଲା ତୋତେ l

  ତ୍ରିଭଙ୍ଗୀ ଠାଣିରେ ବେଣୁ ବଜାଇ, 

  ଜାତି କୁଳ ମାନ ଦେଲୁ ହଯାଇ,

  ଭସାଇ ଦେବି କି ଯମୁନା ସ୍ରୋତେ,

କୃଷ୍ଣ ହେ ବେଣୁ କେ ଦେଲା ତୋତେ l

   ଲଣ୍ଡ ଭଣ୍ଡ କଲୁ ଗୋପ ଦାଣ୍ଡକୁ,

   ଖଣ୍ଡ ଖଣ୍ଡ କଲୁ ଦଧି ଭାଣ୍ଡକୁ,

 ଗୋପୀ ନ ଯିବେ କି ମଥୁରା ହାଟେ,

କୃଷ୍ଣ ହେ ବେଣୁ କେ ଦେଲା ତୋତେ l

  ନମଃ ନମଃ କୃଷ୍ଣ କେଶି କଂସାରୀ,

ବେଣୁ ସିନା ହେଲା ଗୋପୀ ବଇରୀ,

  ନମଃ ବେଣୁପାଣି ତାରିବୁ ମୋତେ,

କୃଷ୍ଣ ହେ ବେଣୁ କେ ଦେଲା ତୋତେ l