ବଦଳେ ପ୍ରକୃତି ରୂପ
ବଦଳେ ପ୍ରକୃତି ରୂପ
କ୍ଷଣେ କ୍ଷଣେ ଯହିଁ ବଦଳି ଯାଉଛି
ପ୍ରକୃତିର ରୂପ ରେଖ
କାଲି ଯିଏ ଥିଲା ସବୁଜ ବନାନୀ
ଆଜି ସେଠି ଅଟ୍ଟାଳିକା ।
କଳ କାରଖାନା ବଢି ବଢି ଚାଲେ
ବିଷାକ୍ତ ହୁଅଇ ବାୟୁ
ସନ୍ତୁଳନ ହରାଇ ଏ ବାୟୁ ମଣ୍ଡଳ
ସୂର୍ଯ୍ୟଙ୍କ ଉତ୍ତାପେ ଜଳେ ଦେଖ ଦାଉ ଦାଉ ।
ସୂର୍ଯ୍ୟଙ୍କ ଉତ୍ତାପ ବଢି ବଢି ଚାଲେ
ବଦଳେ ପୃଥିବୀର ରୂପ
ଅଦିନେ ଆସଇ ବନ୍ୟାର ଲହରୀ
ସ୍ତବ୍ଧ ହୋଇଯାଏ ଜୀବଜଗତ ।
କଳ କାରଖାନା ଧୂଆଁରେ ପୂର୍ଣ୍ଣ
ଆଜିର ଏ ପରିବେଶ
ମୁକ୍ତ ବାୟୁ ଏଠୁ ମିଳିବ ବା କାହୁଁ
ଏଠି ତ ନିତି କଟାହୁଏ ବୃକ୍ଷ ।
ଆସ ଆଜି ଆମେ ବୃକ୍ଷ ଲଗାଇବା
ଜାତିକୁ ଦେବା ସନ୍ଦେଶ
ଗୋଟିଏ ବୃକ୍ଷରେ ଗୋଟିଏ ଜୀବନ
ଭରିଦେବସେ ମହକ ।
ଘର ଆଗ ପଛ ଗଛ ଲଗାଇବା
ଫୁଲ ଫଳେ ଯିବ ଭରି
ହସି ଉଠିବ ଏ ସବୁଜ ବନାନୀ
ଖୁସିର ମହକ ପୁରେ ପୁରେ ଯିବ ଭରି ।
ବସିଯିବା ଯେବେ କିଛି କ୍ଷଣ ପାଇଁ
ସେ ବୃକ୍ଷ ଛାଇରେ ଥକ୍କା ଆମ ମେଣ୍ଟି ଯିବ
ହସିବ ଧରଣୀ ସବୁଜ ବୃକ୍ଷରେ
ବାୟୁ ବି ବିଶୁଦ୍ଧ ହେବ ।