ବାରମାସୀ ଆଶା
ବାରମାସୀ ଆଶା
ଫଗୁଣରେ ଫଗୁ ଅବିର ନ ହେଲ ନାହିଁ
ମନ ଦର୍ପଣରେ ଛିଟଶାଢୀ ପିନ୍ଧା
ଚେହେରାଟା ନିତି ଦିଶୁଥାଉ
ଚୈତ୍ରରେ ଚୋରା ଚଇତାଳି ନ ହେଲ ନାହିଁ
ମନ କାନ୍ଥ ଦେହେ ରଙ୍ଗ ରୋଷଣୀର
ଚିତ୍ରପଟ ଖତେଇ ହେଉଥାଉ
ବୈଶାଖରେ ଝାଞ୍ଜି ବୟାର ନ ହେଲ ନାହିଁ
ମନ ଦୀପାଳିରେ ପ୍ରେମ ସଳିତାଟି
ମିଞ୍ଜି ମିଞ୍ଜି ଜଳୁଥାଉ
ଜ୍ୟେଷ୍ଠରେ କାମନା ଜୁଆର ନ ହେଲ ନାହିଁ
ମନ ଉପକୂଳେ ସ୍ନେହ ଭର୍ମିମାଳା
ଅହରହ ଚୁମୁଥାଉ
ଆଶାଢରେ ଆଶା ଆଶ୍ଵାସନା ନ ହେଲ ନାହିଁ
ମନପବନ ନୈକାରେ ବସି ବରଷା ଭିଜା
ଦୃଶ୍ୟପଟ ଦୃଶ୍ୟମାନ ହେଉଥାଉ
ଶ୍ରାବଣରେ ତରୁଣ ବରୁଣ ନ ହେଲ ନାହିଁ
ମନ ମଉସୁମୀ ପୁରୁବ ଦିଗରୁ
ସୁଲୁସୁଲୁ ବହୁଥାଉ
ଭାଦ୍ରବରେ ଭାବନା କାମନା ନ ହେଲ ନାହିଁ
ମନ ଜହ୍ନିଫୁଲ ପ୍ରୀତି ସଞ୍ଜବେଳେ
ମାଳମାଳ ଫୁଟୁଥାଉ
ଆଶ୍ଵିନରେ କାଚକେନ୍ଦୁ ଇନ୍ଦୁ ନ ହେଲ ନାହିଁ
ମନ ତଡ଼ାଗରେ ପ୍ରୀୟ ନୀଳକଇଁ
ଫୁଟି ହସୁଆଉ
କାର୍ତ୍ତିକରେ ପଞ୍ଚୁକ ତିଳକ ନ ହେଲ ନାହିଁ
ମନ ଚଉରାରେ ତୁଳସୀ ଦୟଣା
ନିତି ପାଉଥାଉ
ମାର୍ଗଶିରେ ଲକ୍ଷ୍ମୀପାଦ ନ ହେଲ ନାହିଁ
ମନ ଗୁରୁବାରେ ମାଣବସା ବ୍ରତ
ଗୁଣୁଗୁଣୁ ଶୁଭୁଥାଉ
ପୌଷରେ ରଙ୍ଗିନ ମଫଲର ନ ହେଲ ନାହିଁ
ମନ ଚାଦରରେ ଶୀତ ସକାଳରେ
ବୁଲା ଚଲା ଚାଲିଥାଉ
ମାଘରେ ବାଘ-ଫାଘ ନ ହେଲ ନାହିଁ
ମନ ସିନ୍ଦୁକରେ ତାଲା ଝୁଲି ଝୁଲି
ବାରମାସୀ ଆଶା ପଦ୍ମତୋଳା ଗାଉ ।।