ବାଇମୁଣ୍ଡିର କଟକ ଚିନ୍ତା

ରାଜା ମରକତ କେଶରୀ ଛାମୁରେ

ଯୋଡ ହସ୍ତେ ହେଲା ଠିଆ ,

ଅଶୀ ବରଷର ବାଇମୁଣ୍ଡି ସେତ

ଦମ୍ଭ କରି ନିଜ ହିଆ ।

ଶୁଣନ୍ତୁ ମଣିମା କ୍ଷୁଦ୍ର ଚାଷୀ ମୁହିଁ

ବିଡାନାସୀ କଟକର ,

କାଠଯୋଡ଼ି ବନ୍ୟା ଦାଉ ସାଧୁଅଛି

ନଦୀ କୂଳ ଚାଷୀଙ୍କର ।

ଯେତେ ଦିନ ଆଉ ରହିଛି ସଂସାରେ

ଘାରୁଛି କଟକ ଚିନ୍ତା ,

ପ୍ରତିକାର ଯେବେ ଏବେଠୁଁ ନହେବ

ଆଗକୁ ହେବୁ ହିନସ୍ତା ।

ରହିବନି ଚିହ୍ନ ମାନଚିତ୍ରେ ଛାମୁ

ଭବିଷ୍ୟତେ କଟକର ,

ଗୁହାରି କରୁଛି ପଥର ବନ୍ଧଟେ

ହେଉ ନଦୀ ତଟ ପର ।

ମୋ ପାଖରେ ଥିବା ଯତ୍କିଞ୍ଚିତ ଅର୍ଥ

ଦେଉଅଛି ଶ୍ରୀଛାମୁରେ ,

ଘେନା ହେଉ ଆଜ୍ଞା ମୋର ସ୍ଵଳ୍ପ ଧନ

ଲାଗୁ ପ୍ରଜାଙ୍କ ହିତରେ ।

ପ୍ରଜାକୂଳ ହିତ ପାଇଁ ବାଇମୁଣ୍ଡି

କରୁଅଛି ଏତେ ଚିନ୍ତା ,

ସ୍ତମ୍ଭିଭୂତ ରାଜା ଦିଅନ୍ତି ବଚନ

କରିବି ନିଶ୍ଚେ ବ୍ୟବସ୍ଥା ।

ମଣିମା ଆଦେଶେ ନଦୀ କୂଳେ କୂଳେ

ହୋଇଲା ବନ୍ଧ ନିର୍ମାଣ ,

ଓଡ଼ିଶାର ଗର୍ବ ଗୌରବ କଟକ

ଦୁଃଖ ହେଲା ଅବସାନ ।

ବାଇମୁଣ୍ଡି ତୁମ ପାଇଁ ରକ୍ଷାହେଲା

କଟକ ବାସୀଙ୍କ ଦୁଃଖ ,

ତୁମ ଏହି ଦାନ ଭୁଲି ପାରିବେନି

ସାରା ଓଡ଼ିଶାର ଲୋକ ।