ବାଇଚଢେଇ
ବାଇଚଢେଇ
ବାଇଚଢେଇରେ ବାଇ ଚଢେଇ
କେଉଁଆଡେ ଯାଉ ଡେଣା ହଲେଇ l
ଟିକିଟିକି ଡେଣା ତୋହର ଅଟେ
ଥକି ପଡ଼ିବୁ ତୁ ନିହାତି ବାଟେ l
ଟିକି ଘରଟି ତୋ ବଡ ସୁନ୍ଦର
ଦେଖିବାକୁ ସତେ କି ମନୋହର l
ଗଛଡାଳଟିରେ ବସାଟି ତୋର
ଦୋହଲୁ ଥାଏ ସେ ଥରକୁ ଥର l
କାଠି କୁଟା ଦେଇ ଅତି ଯତନେ
ବସାଟି ଗଢିଛୁ କେତେ ମଗନେ l
ବାଆ ବତାସକୁ କରୁନା ଭୟ
ହେଉନାହୁଁ କେବେ ତୁହି ଅଥୟ l
ବରଷା ବତାସ ତୁହି ଦେଖିଲେ
ଛୁଆପିଲା ସାଥେ ଲୁଚୁ ତୁ ଭଲେ l
କେଡେ ସୁନ୍ଦରିଆ ବସା ଭିତରେ
ଟିକି ପରିବାର ମନ ଖୁସିରେ l
ରହିଥାଅ ଦେଖି ଆଶ୍ଚର୍ଯ୍ୟ ଲାଗେ
ତୋହର ପ୍ରଶଂସା କରେ ସର୍ବାଗେ l
ତୋ ପରିକି ହୋଇଥାନ୍ତି ମୁହିଁ
ଉଡି ବୁଲୁଥାନ୍ତି ଗଗନେ ଚାହିଁ l