ଅନୁତାପ

ବୁଝି ଓ ବିଚାରି ଉତ୍ତମ ନିଷ୍ଠାରେ

   କରିବା ଉଚିତ କାମ

ମନଯୋଗ ବଳେ ସଠିକ ଉଦ୍ୟମେ

   ମିଳେ ଭଲ ପରିଣାମ ।

ମଣିଷ ମାତ୍ରକେ ହୋଇପାରେ ଭୁଲ

   ଅଜାଣତେ ଅନଭ୍ୟାସେ

ଉତ୍ତମ ମଣିଷ ସୁଧାରେ ନିଜକୁ

   କରେନି ତ୍ରୁଟି ଭବିଷ୍ୟେ ।

ଆସଇ ଜୀବନେ ଦ୍ୱନ୍ଦ୍ୱାତ୍ମକ ସ୍ଥିତି

   କଷ୍ଟକର ଆକଳନ

ସ୍ୱ।ର୍ଥ ବୃହତ୍ତର ସାଧନ ନିମନ୍ତେ

   ଲୋଡ଼ା ପଡ଼େ ବଳିଦାନ ।

କର୍ତ୍ତବ୍ୟ ପାଳନ ପଥେ ଉଭା ହୁଏ

  ବାଧା ବିଘ୍ନ ଶତ ଶତ

ସାହସ ଅଦମ୍ୟ ଧୈର୍ଯ୍ୟ ଅସୀମ

  ଅନିବାର୍ଯ୍ୟ ଆବଶ୍ୟକ ।

ଅନୁଚିତ କର୍ମେ ହୁଏ ପଶ୍ଚାତାପ

   ତ୍ରୁଟି ପାଇଁ ମନସ୍ତାପ

ଘାରି ହୁଏ ମନ ଅନ୍ତର ସନ୍ତପ୍ତ

  ଲାଗେ ସବୁ ବିଷ ପାପ ।

କାୟ ମନୋବାକ୍ୟେ ସଦଉପଚାର

  କ୍ଷୟକ୍ଷତି ସଂଶୋଧନ

ପ୍ରଶମିତ କରେ ଅନୁତାପାନଳ

  ମିଳେ କ୍ରମେ ଉପଶମ ।