Library
Profile
ଅନଲାଇନ ଆସର
ଅନଲାଇନ ଆସର
ବିଜ୍ଞାନ ଦେଇଛି ସୁଯୋଗ ଅପାର
କିଏ କାହା ଠାରୁ ନୁହେଁ ଆଉ ଦୂର |
ଦାମୀ ସ୍ମାର୍ଟ ଫୋନ ଲୋଡ଼ା ହୁଏ ଏକ
ବ୍ୟବହାରେ କିଛି ନାହିଁତ ବାଧକ |
ଇଣ୍ଟରନେଟର ସଂଯୋଗ ବଳରେ
ସବୁ କଥା ସିଏ ପହଞ୍ଚାଇପାରେ |
ବ୍ୟବହାର ତାର ଅଟେ ବହୁବିଧ
ପାଠ ପଢ଼ା ଠାରୁ ସିନେମା ପର୍ଯ୍ୟନ୍ତ |
କରୋନା କାଳରେ ଏକମାତ୍ର ସାହା
ହୋଇ ଦେଇଥିଲା ସମସ୍ତଙ୍କୁ ରାହା |
କବିମାନେ କରି କବିତା ଆସର
ଆବୃତ୍ତି କରନ୍ତି ନିଜର ସମ୍ଭାର |
ଦୂରେ ଥିଲେ ଯେବେ ଆତ୍ମୀୟ ସ୍ୱଜନ
ଭିଡିଓ କଲିଙ୍ଗ ତୋଷୁଥିଲା ମନ |
ଅନଲାଇନରେ ପାଠପଢା ଚାଲେ
ସମୟକୁ ନେଇ ଛାତ୍ର ଛାତ୍ରୀ ବଳେ |
ଡାକ୍ତରୀ ଚିକିତ୍ସା କରୁଅଛି ନିତି
ଔଷଧର ଚିଠା ସେଥିରେ ଆସୁଛି |
କରୋନା ରୋଗକୁ ଭୟ କରି ଜନେ
ବାହାରେ ନଯାଇ ରହିଲେ ଗୋପନେ |
ପ୍ରେମ ବାର୍ତ୍ତାଳାପ ପାଇଁ ଯେ ଆସର
ଦେଇଛି ସୁଯୋଗ ଅନେକ ପ୍ରାଣର |
ନାହିଁ ଦେଖା ଚାହାଁ ବାସ୍ତବ କ୍ଷେତ୍ରରେ
ପ୍ରେମେ ପରିଣତ ଦୁଇ ସମ୍ପର୍କରେ |
କାହା ଭାଗ୍ୟେ ଲାଭ କାହା ଭାଗ୍ୟେ କ୍ଷତି
ବୁଝେନାହିଁ କେବେ ସ୍ମାର୍ଟଫୋନ କିଛି |
ବିବାହ ସମ୍ପର୍ଣ୍ଣ ହୁଏ ଆସରରେ
ବନ୍ଧୁ ପରିଜନେ ଦେଖନ୍ତି ଅଧୀରେ |
ଆଶୀଷ, ଶୁଭେଚ୍ଛା ସବୁ ଦିଆନିଆ
ଭାବ ବନ୍ଧନରେ ବାନ୍ଧିଦିଏ ତାହା |
ଗୁଗୁଲ ମିଟ ବା ଜୁମ ଜରିଆରେ
ସବୁ କାମ ହୋଇଥାଏ ସୁରୁଖୁରେ |
ଦେଶ ବିଦେଶରେ ରହି ଏ ମଣିଷ
ନିତି ପାଏ ଦେଖା ନଥାଇ ପରଶ |
ଆବଶ୍ୟକ ସ୍ଥଳେ ଜରୁରୀ ବେଳରେ
ଦେଶ ଅନ୍ୟ ଦେଶେ ବାର୍ତ୍ତାଳାପ କରେ |
ପୃଥିବୀ ସ୍ତରରେ ସମସ୍ୟା ସକଳ
ଆଲୋଚନା ବଳେ କରିଛି ସଫଳ |
ଇଣ୍ଟରନେଟର ସଦ୍ୟ ସୁଲଭତା
ଆସରରେ ଜାଳେ ପ୍ରୀତିର ସଳିତା |
ଦେଲାପରେ ମଧ୍ୟ ଏତେ ସବୁ ସୁଖ
ଭରୁଛି ବିଶ୍ୱରେ ଅନାହୁତ ଦୁଃଖ |
ସନ୍ତ୍ରାସବାଦ ଯେ କରି ଉପଯୋଗ
ଆକ୍ରମଣ ପାଇଁ ପାଉଛି ସୁଯୋଗ |
ଚୋରି ଡକାୟତି ନିର୍ବିଘ୍ନେ ଚାଲୁଚି
ସାଇବର ଅପରାଧ ଯେ ବଢ଼ୁଛି |
ଅନଲାଇନର ଆବିଷ୍କାର ଫଳେ
ଲାଭ ଅବା କ୍ଷତି ଉଭୟ ତ ମିଳେ |
