ଅମର ପ୍ରେମ

କଥା ଦେଉଅଛି ଆଗୋ ରାଧାରାଣୀ

ମଥାକୁ ତୁମର ଛୁଇଁ

ଯୁଗ ଯୁଗ ପାଇଁ ଆମ ପ୍ରେମ ଗାଥା 

ରହିବ ଅମର ହୋଇ ।

କେଳି କୁଞ୍ଜବନ ଯମୁନା ତଟିନୀ

ଆମରି ପ୍ରେମର ସାକ୍ଷୀ

ପ୍ରେମୀଙ୍କ ମନରେ ଜାଗିବ ଭାବନା

ଫୁଲର ବଗିଚା ଦେଖି ।

ବଂଶୀରୁ ନିଃସୃତ ପ୍ରେମର ଝଙ୍କାର

ଶୁଣିଲେ କର୍ଣ୍ଣରେ ପ୍ରେମୀ

ପାଗଳ ପରାଏ ପ୍ରୀତିର ତାଳରେ

ନାଚିବେ ସଭିଏଁ ଝୁମି ।

ସରଗ ମରତ ତିନି ଭୁବନରେ

ଶାଶ୍ୱତ ପ୍ରେମର ମୂଲ୍ୟ

ସଭିଙ୍କ ହୃଦୟେ ଭରିଦେବି ପ୍ରିୟା

ଅମୃତ କଣିକା ତୁଲ୍ୟ ।

ମିଠା ରାଗରୁଷା ମାନ ଅଭିମାନ

ଝରାଇ ଦେଇଛ ସଖୀ

ପ୍ରେମକୁ ମଧୁର କରିବେ ସକଳେ

ହୃଦୟେ ସାଇତି ରଖି ।

ହୃଦେ ବ୍ୟାକୁଳତା ମିଠାମିଠା ବ୍ୟଥା

ଅନେକ ଭାବନା ଭରି

ଜୀବନ ପରିଧି ପ୍ରୀତିର ପରଶେ

ଦେବି ମୁଁ ରଙ୍ଗୀନ କରି ।

ପ୍ରକୃତି ବକ୍ଷରେ ଋତୁ ପରେ ଋତୁ

ଆସିବେ ପ୍ରୀତିକୁ ନେଇ

ହୃଦେ ଆଲୋଡନ ଦେହେ ଶିହରଣ

ଭରିବେ ଆନନ୍ଦ ହୋଇ ।

ଅପୂର୍ବ ଅନନ୍ୟ ପ୍ରେମ ଅନୁଭବ

ଜୀବନେ ପାଇବା ପାଇଁ

ପୂଜିବେ ଦୁହିଁଙ୍କ ଚରଣ ଯୁଗଳ

ଅନ୍ୟଥା ହୋଇବ ନାହିଁ ।

ହୃଦୟ ମିଳନେ ପ୍ରେମ ପୂଜାପାଏ

ବୁଝିବେ ଜଗତ ଜନ

ଦୈହିକ ମିଳନେ ପ୍ରେମ କ୍ଷଣସ୍ଥାୟୀ

ନିରାଶ ହୋଇବ ମନ ।

ପ୍ରକୃତି ବକ୍ଷରେ ପ୍ରତିଟି ହୃଦୟେ

ଭରିବି ପ୍ରେମର ଶକ୍ତି

ମୋ'ପ୍ରେମେ ଅଧିର ହୋଇବେ ଯେ'ଜନ

ଲଭିବେ ଜୀବନେ ମୁକ୍ତି ।

ପ୍ରେମ ଚିରନ୍ତନ ପବିତ୍ର ଭାବନା

ଅକ୍ଷୟ ଅମୃତ ଧାରା

ପ୍ରେମ ସତ୍ୟ ଶିବ ସୁନ୍ଦର ସୁରଭି

ଜାଣିବେ ଜଗତ ସାରା ।