ଅମଳ
ଅମଳ
ଆସିଲା ବରଷା ରାଣୀ
ଦେଇଗଲା ସିଏ ପାଣି
ଚଷା ଭାଇ ତୁ ରେ ହଳ କରିଦେଇ
ମଞ୍ଜି ଦେଇ ଯାଆ ବୁଣି ।
ମଞ୍ଜି ବୁଣିଦେବୁ କ୍ଷେତ ତୋ ହସିବ
ତୋ ମନ ବି ପୁରି ଯିବ
ବିଚାର ନ କରି ବସିଥିବୁ ଯଦି
ଅନାବନା ଘାସ ହେବ ।
ଅନାବନା ଘାସ ହୋଇଗଲେ ଥରେ
ଉପାଡିବା କେତେ କଷ୍ଟ
ସେ କଥା ତୋ ଠାରୁ କିଏ ବେଶି ଜାଣେ
କହି ଦେ ତାର ଗୁରୁତ୍ଵ ।
ଜମି ହଳ ସଙ୍ଗେ ମନଟାକୁ ତୋର
ସଦା ହଳ କରୁଥିବୁ
ଅନାବନା ଭାବ ଉପାଡ଼ି ଦେଇ ତୁ
ଭଲ ମଞ୍ଜି ବୁଣୁଥିବୁ ।
ତୋ ମନ କ୍ଷେତରେ ସକରାତ୍ମକ ର
ବିହନ ତୁ ବୁଣୁଥିବୁ
ନ ହେଲେ ତୋ ମନେ ନାହିଁ ନାହିଁ ଭାବ
ପୁରି ଯିବ ଦେଖୁ ଦେଖୁ ।
ତୋ ମନ କ୍ଷେତରେ ସୁବିଚାର ଦେଇ
ଫସଲ ଫଳାଉ ଥିବୁ
ନକାରତ୍ମକତା ଯାଗା ପାଇବନି
ଆନନ୍ଦରେ ଝୁମୁ ଥିବୁ ।
ସକାରାତ୍ମକ ର ଫସଲ କାଟି ତୁ
ଯେବେ ଅମଳ କରିବୁ
ସେ ଅନୁଭବକୁ ଏକତ୍ରିତ କରି
ମୋତେ ଚିଠିଟିଏ ଦେବୁ ।
ତୋ ଅନୁଭବ ଯେ ସ୍ନେହ ଶ୍ରଦ୍ଧା-ପ୍ରୀତି
ଶାନ୍ତିରେ ଥିବ ମଣ୍ଡିତ
ସେ ଅମୂଲ୍ୟ ଚିଠି ଅପେକ୍ଷାରେ ଅଛି
ଜଣାଇବୁ ମୋର ମିତ ।।