ଅଳସୀ

ରୂପେଲି ଜହ୍ନ ଆଲୁଅରେ ତୋର

ସୁନେଲି ସୁନ୍ଦର ମୁହଁ,

ରୂପ ରାଇଜର ରାଜକୁମାରୀ ତୁ

ଅଳସୀ ନଈର ସୁଅ ।

ଆକାଶ ଛାତିରେ ଲହଡ ଭାଂଗଇ

ତୋର ନୀଳ ରଂଗ ଶାଢୀ,

ଗୋରା ଦେହରେ ତୋ ବିଜୁଳି ଚମକ

ମୋ ଛାତିରେ ଘଡଘଡି ।

ଗଢିବାରେ ବିହି ଊଣା ତ କରିନି

ତୋର ରୂପ ତୋର ଅଂଗ,

ସପନେ ତୋ ଛବି ଆଙ୍କୁଆଙ୍କୁ ମୋର

ସରିଯାଏ ସବୁ ରଂଗ ।

ଦିନରେ ମୋହର ଆଖି ଆଗେ ଥାଉ

ରାତିରେ ସପନ ହେଉ,

ନିଦ ଭାଂଗେ ମୋର ତୋ କେଶ ଛୁଆଁରେ

ରାତି ମୋର ପାହୁ ପାହୁ ।

ଜାଣେନାହି ତୁହି କେମିତିକା ଝିଅ

ଗୁଆ ଘିଅ ଅବା ମିଠା ମହୁ,

ଏଇନେ ମୋ ଆଖି ଆଗରେ ତୁ ଥାଉ

ପଲକ ପଡିଲେ ନାହୁଁ ।