Library
ଅକ୍ଷରା
ଅକ୍ଷରା
ଖାଦ୍ୟବସ୍ତ୍ର ବାସ ଥିଲେ ହେବ କିସ
ପୁଣି ବହୁ ଧନ ରତ୍ନ
ମାତ୍ର ପ୍ରେମ ବିନା ପ୍ରାଣ ହୁଏ ସିନା
ଜଳ ବିନା ଯେହ୍ନେ ମୀନ ।
ଅଛିଟି ଜଗତେ ମାନ୍ୟ କେତେକେତେ
ସ୍ଵାର୍ଥ ବଶେ ଆପାଣାର
ପ୍ରେମ ବଳେ ପ୍ରାଣୀ ପାରିଥାଏ ଜିଣି
ଅନ୍ୟକୁ କରି ନିଜର ।
ପ୍ରେମ ଅଟେ ସାର ଦି' ଗୋଟି ଅକ୍ଷର
ଅମୃତ ରସରେ ଠୁଳ
ଦିବ୍ୟ ଅନୁପମ ଗୁଣରେ ସମ୍ପନ୍ନ
ମାନବର ହୃଦ ସ୍ଥଳ ।
ମାନ ଗୋବିନ୍ଦର ଆତିଥ୍ୟ ସ୍ୱୀକାର
ନକରି ଶାନ୍ତିର ଦୂତ
ଅତି ପ୍ରେମ ଭରେ ବିଦୁର ର ଘରେ
ଖାଇଲେଟି ଶାଗ ଭାତ ।
ହୋଇ ଗୋପାଲୁଣୀ ସେ ଯେ ରାଧା ରାଣୀ
ପ୍ରେମରେ କରିଲା ବଶ
ଶ୍ରୀରାଧା ରମଣ ନାମେ ଭକ୍ତଗଣ
ଆନନ୍ଦେ ଗାଇଲେ ଯଶ ।
ତାର ଭାଗ୍ୟ ଧନ୍ୟ ପ୍ରେମ ତା ମହାନ
ଜାତିରେ ଅଟେ ଶବରୀ
ଅତି ପ୍ରେମ ବଳେ ଅଇଁଠାର ଫଳେ
ତୋଷିଲା ରାମ ଶ୍ରୀହରି ।
ଚାହେଁ ନାହିଁ ପ୍ରେମ ମତ ପନ୍ଥ ଧର୍ମ
ବଂଶଜାତି ଆଭିଜାତ୍ୟ
ପ୍ରେମ ମୂଳେ ସ୍ଥିତ ସମଗ୍ର ଜଗତ
ପ୍ରେମହିଁ ଶାଶ୍ଵତ ସତ୍ୟ ।
ମୋହ ମାୟା ତେଜି ସ୍ଵାର୍ଥକୁ ବରଜି
ଶାଶ୍ଵତ ପ୍ରେମ ଆଚର
ବିଶ୍ଵ ମଧୁ ମୟ ହୋଇବ ନିଶ୍ଚୟ
ନ ଥିବ ଆପଣା ପର ।
