ଅଗଷ୍ଟ ପନ୍ଦରର ତ୍ରିରଙ୍ଗା
ଅଗଷ୍ଟ ପନ୍ଦରର ତ୍ରିରଙ୍ଗା
ଅଗଷ୍ଟ ପନ୍ଦରରେ ଉଡ଼ିବ ତ୍ରିରଙ୍ଗା
ଚତୁର୍ଦିଗେ ହୋଇ ଫରଫର
ସ୍ୱାଧୀନତାକୁ ମନେ ପକାଇ ଦେଶରେ
ଉଛୁଳାଇବ ନିଜର ସ୍ବର ।
ରଙ୍ଗ ବେରଙ୍ଗରେ ନାଚିବେ ଦଳ ଦଳ
ପ୍ରଧାନମନ୍ତ୍ରୀ ଦେବେ ପୁରସ୍କାର
ଅଗଷ୍ଟ ପନ୍ଦର ପାରେଇଲେ ଏ ଦେଶେ
ତ୍ରିରଙ୍ଗା ରହେ ଯେ ବାକ୍ସ ଭିତର ।
ଭାରି ମଜା ଲାଗେ ଦେଖିବା ପାଇଁକି
ମନେ ନପଡ଼ନ୍ତି ସହିଦ ବୀର
ତାଙ୍କ ପ୍ରତି ଛବିରେ -ରଙ୍ଗ ମରା ଚାଲେ
ଆସିଗଲେ ରେ ଅଗଷ୍ଟ ପନ୍ଦର ।
ସତ୍ୟ, ଶାନ୍ତି,କ୍ଷମା ପ୍ରତୀକ ପତାକା
ଦେଶ ସାରା କରିବେ ନମସ୍କାର
ଦିନେ ପାରେଇଲେ, ଯଦି ଖୋଜା ପଡେ
ସହଜରେ ହୁଏନି ଆବିଷ୍କାର ।
ସ୍ୱାଧୀନତାର କଥା ଭାଷଣରେ ଚାଲେ
ପରାଧୀନ କିନ୍ତୁ ଦେଶ ଭିତର
ଉଠିବା ଠାରୁ ଶୋଇବା ପର୍ଯ୍ୟନ୍ତ ସିଏ
ଦେଇ ଚାଲେ ସବୁରେ କର ।
ମୈତ୍ରୀ ପ୍ରୀତିର ଭାବ ଖେଳିବ ଏଦିନ
ପର ଦିନକୁ କିଛି ନ ଥାଏ ମନର
ଆଶା ଭରସାର ସ୍ତମ୍ଭ ତ୍ରିରଙ୍ଗା କୁରେ
ଆଜି ଆମେ କରିବା କେତେ ନମସ୍କାର ।
ପରାଧୀନ ହୋଇ ଗାଇ ପାରିବାକି ଭଲ
କଥାକୁ ମୁହଁରେ ସ୍ୱାଧୀନତାର
ଦେଖା ସ୍ୱାଧୀନତା ଆମେ ପାଳୁଛେ ଦେଶରେ
ମିଛେ କରନ୍ତି ଜୟ ଜୟ କାର ।
ସେ କିନ୍ତୁ ସତ୍ୟ ଦେଖେ ନ୍ୟାୟ ଅନ୍ୟାୟର
କେତେ କଥା ଧରିଛି ହୃଦର
ତ୍ରିରଙ୍ଗା କହୁଛି କାହାଣୀ, ଦେଶ ଭିତରେ
ଶତ ପ୍ରଣାମ ହେ ଘେନ ଆମ୍ଭର ।