ଅଗଷ୍ଟ ପନ୍ଦର

ମନେ ପକାଇବା ଏହି ଉତ୍ସବକୁ

   ଆସରେ ସଭିଏଁ ଧାଇଁ

ସ୍ୱାଧୀନତା ପାଇଁ ଆତ୍ମ ବଳିଦାନ

   ଦେଇଛନ୍ତି ଆମ ପାଇଁ

   ତ୍ରିରଙ୍ଗା ପତାକା ଥୋଇ

ଜାତୀୟ ସଂହତି ଉଦବୁଦ୍ଧ ପାଇଁ 

   ଏକ ମନ ପ୍ରାଣ ହୋଇ।୧

ଗର୍ବ ଓ ଗୌରବ ଏ ଭାରତ ପାଇଁ

   ଧ୍ୱଜା ଆଜି ଉଡାଇଲେ 

ତ୍ରିରଙ୍ଗା ପତାକା ଜନ୍ମ ଦେଇ କରି

   ଯିଏ ରଙ୍ଗ ଦେଇଥିଲେ

   ସଭକ୍ତିରେ ଉଡ଼ାଇଲେ 

ଜନଗଣ ମନ ସଙ୍ଗୀତ ଗାଇଲେ

   ହୃଦୟରେ ଭକ୍ତି ଖେଳେ।୨

ରାମଧେନୁ ଗୀତ ପ୍ରଭାତ ଫେରିରେ

   ଆହା ମନ ମୋହୁଅଛି

ଜାତୀୟତା ଭାବ ଭାଇଚାରା ସହ

   ପ୍ରେମ ଓ ଭକ୍ତିକୁ ବାଛି

   ଜାତି ଧର୍ମ ଭୁଲୁଅଛି

ଏ ଜୀବନ ନୌକା ବୋହି ନେବା ପାଇଁ

   ଏ ଦିବସ ଆସିଅଛି।୩

କିଏ କେଉଁଠାରେ ରହିଅଛ ଭାଇ

   ଦେହକୁ ଜାଗ୍ରତ କର

ଜାତୀୟ ପତାକା ତଳେ ଠିଆ ହୋଇ

   ଯୋଡ଼ି ଦିଅ ନିଜ କର

   ଶପଥ ହେଉ ଏଥର

ଦେଶର ପ୍ରଗତି ପାଇଁ ଆଜିକାଲି

   ଶୁଭ କର୍ମ କରିବାର।୪

ଆହ୍ବାନ କରୁଛି ଏ ଅଭାଗା ପୁଅ

   ଆଜିର ଶୁଭ ଲଗ୍ନରେ

ଭୁଲି ହିଂସା ଦ୍ୱେଷ ହତ୍ୟା ଓ ଲୁଣ୍ଠନ

   ଏକତାକୁ ଆଣିବାରେ

   ହାତକୁ ମିଳାଇ ବାରେ

ପୂର୍ବ ପୁରୁଷଙ୍କୁ ମନେ ପକାଇବା 

   କହି ଜୟଜୟ ସ୍ଵରେ।୫