ଅଦୃଶ୍ୟ ତପସ୍ୟା ବଳେ
ଅଦୃଶ୍ୟ ତପସ୍ୟା ବଳେ
ଯାହାକୁ ଭାବଇ ନିଜର ଏ ମନ
ସେ ବୁଝେନା ମନ ଭାଷା,
କାହାକୁ ଖୋଜୁଛି କହିବାକୁ କିଛି
କରିଅଛି ମନେ ଆଶା ।
ହୃଦ ତଳ କଥା ଅକୁହା ବେଦନା
ଜିଭ ତଳେ ଢୋକିଅଛି,
ମୋ ଭାଗ୍ୟ ରେଖାରେ ଆଉ କିଛି ରେଖା
ଛନ୍ଦି ହୋଇ ରହିଅଛି ।
ସଞ୍ଜ ନଇଁଲାଣି କାହାକୁ ଖୋଜୁଛି
ଗୋଧୂଳି ଦାଣ୍ଡ ଧୂଳିରେ ,
ନିସଙ୍ଗ ବେଳାରେ ପ୍ରତି ମୁହୂର୍ତ୍ତରେ
ଏ ସଂସାର ଖେଳଘରେ ।
ଦିନ ପରେ ରାତି ରାତି ପରେ ଦିନ
ନିତି ଖୋଜେ ହୃଦୟରେ ,
କେଉଁଠୁ ଆରମ୍ଭ କେଉଁଠି ଯେ ଶେଷ
ଅନ୍ତହିନ ଭାବନାରେ ।
ଧୂଳି ଧୂସରିତ କ୍ଲାନ୍ତ ପଥଧାରେ
କେଉଁ ଦୂର ଇଲାକାରେ ,
ତୁମକୁ ଖୋଜିବା ତୁମକୁ ପାଇବା
ଇଚ୍ଛା ଅଛି ଜୀବନରେ ।
ଅସରନ୍ତି ଏଇ ଅନୁଢ଼ା ଇଚ୍ଛାର
ଶୂନ୍ୟ ପଣତର ତଳେ ,
ପାଇଲେ ତୁମକୁ ଏ କାନି ପଣତ
ଭିଜିବ ଲୋତକ ଜଳେ ।
ସତେ କଣ ପ୍ରଭୁ ଦେଖାଦେବ ତୁମେ
ଅଦୃଶ୍ୟ ତପସ୍ୟା ବଳେ ,
ଅନ୍ତିମ ଖୋଜା ମୋ ଶେଷ ହୋଇଯିବ
ଲୀନ ହେବି ପାଦ ତଳେ ।