ଅଦିନିଆ ବର୍ଷା
ଅଦିନିଆ ବର୍ଷା
ବରଷା ଋତୁରେ ବର୍ଷା ଭଲ ଲାଗେ
ଭରିଥାଏ କେତେ ଆଶା
କୃଷକ ହୃଦୟେ ସବୁଜ ସପନ
ପ୍ରେମୀ ନୟନରେ ଭାଷା |
ବର୍ଷା ପାଇଁ ସାରା ଜଗତ ବଞ୍ଚିଛି
ଶୋଭାମୟ ଧରା ଧାମ
ଶ୍ରାବଣୀର ଛୁଆଁ ଘନ ବନାନୀରେ
ରଙ୍ଗ ଭରେ ଘନ ଶ୍ୟାମ |
କିନ୍ତୁ ବେଳେ ବେଳେ ଅଦିନିଆ ବର୍ଷା
ଆସେ ସାଥେ ଦୁଃଖ ନେଇ
ଦେଖାଏ ନିଜର କ୍ଷୁବ୍ଧ ରୂପ ସତେ
ଅଯାଚିତେ ଢାଳିଦେଇ |
ଅଦିନିଆ ମେଘ ବର୍ଷି ଥାଏ ବହୁ
କୁଆପଥର ବି ଖସେ
ଚାଷୀର କ୍ଷେତରେ ସୁନାର ଫସଲ
ଅକାରଣେ ସବୁ ନାଶେ |
ପୌଷ ମାଘେ ଆସି ଶୀତର ପ୍ରକୋପ
ଅଧିକ ବଢ଼ାଇ ଦିଏ
ଦେହ ଥରିଯାଏ ଅଭାବୀ ମଣିଷ
ଦୁଃଖ ଭୋଗ କରିଥାଏ |
ଜୀବନ ଜୀବିକା ଉଜାଡି ଦିଏ ସେ
ସବୁକାମ ଧୀର ହୁଏ
ପଶୁ ପକ୍ଷୀ ସବୁ ହନ୍ତସନ୍ତ ହୋଇ
ରହନ୍ତି ଛାଡିବା ଯାଏ |
ଆକାଶରେ ମେଘ ଦୋଳି ଖେଳୁଥାଏ
ସୂରୁଜ ଦିଶନ୍ତି ନାହିଁ
ଚକୋର ଭୀତିରେ ବସିଥାଏ ସତେ
ଗଛଡାଳେ ଲୁଚିରହି |
ପଲ୍ଲୀରୁ ସହର ସବୁଠାରେ କଷ୍ଟ
ଆଣେ ଅଦିନିଆ ବର୍ଷା
ଶୀତୁଆ ଦେହରେ ବାହାରି ହୁଏନି
ଫାଙ୍କାଳିଆ ହୁଏ ରାସ୍ତା |
ଗାଈ ଗୋରୁ ସବୁ ଗୁହାଳେ ରହନ୍ତି
ଶୁଭେନି ଗଉଡ଼ ଡାକ
ଥଣ୍ଡା ପବନରେ ନୀରବେ ରହନ୍ତି
ସହିବାକୁ ବାଧ୍ୟ ଭୋକ |
ଅଦିନିଆ ମେଘ ଆସିଥାଏ ପରା
ଅଦିନ କୁଣିଆଁ ପରି
ପାଏ ନାହିଁ ଶ୍ରଦ୍ଧା ଅକାରଣେ ବର୍ଷି
ଦିନକରେ ଯାଏ ଫେରି |