ଅଧିକାର

ସଫଳତା କେବେ ଆପେ ଆସେ ନାହିଁ

ସଂଘର୍ଷରେ ଅଣାଯାଏ ,

ଜନ୍ମଗତ କିଛି ଅଧିକାର ଅଛି

ସଂଗ୍ରାମରେ ପ୍ରାପ୍ତି ହୁଏ ।

ଅଧିକାର ସ୍ୱୟଂ ନୈତିକ,ନ୍ୟାୟିକ

ବ୍ୟକ୍ତିର ପଦମର୍ଯ୍ୟାଦା ,

ଅଧିକାର ଯଦି ଦଳି ଦିଆଯାଏ

କ୍ଷୋଭ ଆସେ ଲଭି ବାଧା ।

ବେଳେବେଳେ ଏଇ ସ୍ୱାର୍ଥର ମଣିଷ

ନ୍ୟାୟପୂର୍ଣ୍ଣ ଅଧିକାର ,

ଦଳାଚକଟାର ସାମଗ୍ରୀ ଭାବରେ

କରିଥାଏ ହତାଦର ।

କେବେ କେବେ ପୁଣି ସେ ଅଧିକାରର

ଅନ୍ୟାଯ୍ୟ ପ୍ରୟୋଗ କରି ,

ଅନ୍ୟ ଅଧିକାର ସଙ୍କୁଚିତ କରେ

ହୋଇ ତୃଷ୍ଣାର ପୂଜାରୀ ।

ଅଧିକାର ଆଉ କର୍ତ୍ତବ୍ୟ ଅବଶ୍ୟ

ଉଭୟେ ପରିପୂରକ ,

ଅଧିକାର ଭାବି ଅନଧିକାରର

ହୁଅନା ପୃଷ୍ଠପୋଷକ ।

ଉତ୍ତମ ବ୍ୟକ୍ତିକୁ ଅଧିକାର କେବେ

ମାଗିବାକୁ ପଡେନାହିଁ ,

ନମ୍ରତାପଣରେ ନଇଁ ନଇଁ ଆସେ

ସୁଧୀର, ପ୍ରଶାନ୍ତ ହୋଇ ।

ସାମ୍ପ୍ରତିକ ଆମ ରାଜନୈତିକତା

ଧର୍ମଘଟ ରୂପ ଦେଇ ,

କଦର୍ଯ୍ୟ ଅର୍ଥରେ ସଜେଇ ଚାଲିଛି

ଅନଧିକାରକୁ ନେଇ ।

ନ୍ୟସ୍ତସ୍ଵାର୍ଥୀମାନେ ଦର୍ପେ ଅହଙ୍କାରେ

ସାଜିଥାନ୍ତି ଦାବିଦାର ,

ଦାବି, ଅଧିକାର ମଧ୍ୟରେ କରନ୍ତି

କର୍ତ୍ତବ୍ୟକୁ ପରିହାର ।

ଅଧିକାର ସହ ନିଜସ୍ୱ କର୍ତ୍ତବ୍ୟ

ଉଭୟେ ପରିପୂରକ ,

ଅଧିକାର ଆଶା କରିବା ପୂର୍ବରୁ

ହୁଅ କର୍ତ୍ତବ୍ୟପାଳକ ।