ଅଧେ ଆପଣା ଅଧେ ପର

ମଣିଷ ସହଜେ ସାମାଜିକ ପ୍ରାଣୀ

ରହି ସମାଜ ଭିତରେ

ପରସ୍ପର ପ୍ରତି ପରିଚୟ ପୁଣି

ସମ୍ପର୍କ ସ୍ଥାପନ ଧାରେ

ସମଭାବାପନ୍ନ ଚିନ୍ତାଧାରା ପ୍ରାୟ

ଅଭାବ ପରିଲକ୍ଷିତ

ଅନ୍ୟ ସୁଖ ଶିରି ମନରେ ଅସହ୍ୟ

ଈର୍ଷା ଭାବ କ୍ରମେ ଜାତ

ଗାଁ ପରିବେଶ ସମ୍ପୂର୍ଣ୍ଣ ନିଆରା

ଭାଇଚାରା ମନୋଭାବ

ସୁଖରେ ଦୁଃଖରେ ସହଭାଗିତାରେ

ସମସ୍ୟା ହୁଏ ଲାଘବ

ତଥାପି ଅନ୍ୟର ବାହ୍ୟ ଆଡମ୍ବର

ଅବା ଚାକ ଚକ୍ୟ ଧାରେ

ଅହେତୁକ ଈର୍ଷା ମନୋଭାବ ଜାତ

ପାଖ ପଡ଼ୋଶୀ ମନରେ

ଗ୍ରାମ୍ୟ ପରମ୍ପରା ଅବା ବିଧାନର 

ବ୍ୟତିକ୍ରମ ହେବା ଜାଣି

ଗ୍ରାମ୍ୟ କମିଟିର ନିଷ୍ପତ୍ତି ବଳରେ

ଦୋଷ ଭାବେ ଗଣା ପୁଣି

ନିଆଁ ପାଣି ମନା ଦଣ୍ଡ ସ୍ଵରୁପରେ 

ଏକ ଘରିଆ ସିଦ୍ଧାନ୍ତ

ଅଧେ ସମର୍ଥନ ଅଧେ ବିରୋଧରେ

ଦୋଷୀ ହୁଏ ହନ୍ତସନ୍ତ

ତଥାପି ଆବେଗ ଥାଏ ହୃଦୟରେ 

ବିରୋଧୀଙ୍କ ସମ୍ମୁଖରେ

ଏକାକୀ ବଞ୍ଚିବା ସଂଘର୍ଷ ସହିତ

ସେଇ ପରିବେଶ ଧାରେ

ପୂଜା ପର୍ବ ଯାତ୍ରା ମେଳା ସ୍ଥଳେ

ଅଧା ଅଧା ସମର୍ଥନ

ସେଇ ଅଧେ ଭାଗ ସହିତରେ

ଖୁସିରେ ବିତେ ଜୀବନ

ସଭ୍ୟତାର କ୍ରମ ବିକାଶ ଧାରାରେ

ବଦଳିଛି ଗାଆଁ ଦୃଶ୍ୟ

ସହରୀ ଢାଞ୍ଚାରେ ଜୀବନ ଯାପନ

ବିପର୍ଯ୍ୟସ୍ତ ପରିବେଶ 

ଅଧେ ଆପଣାର ଅଧେ ପୁଣି ପର

ଗାଆଁ ଅବା ସହର ରେ

ସମଭାବାପନ୍ନ ଅଭାବ ପ୍ରାୟତଃ 

ଗୁରୁତ୍ୱପୂର୍ଣ୍ଣ କାର୍ଯ୍ୟରେ

ଘର ପାଖେ ଘର ପଡ଼ୋଶୀ ଯଦିଓ

ପରସ୍ପରକୁ ଅଜଣା 

ସଞ୍ଜ ସକାଳେ ଦେଖା ହୁଏ ନିତି 

ଦେଖି ଅଦେଖା ବାହାନା

ଅଧେ ଆପଣାର ଅବା ଅଧେ ପର

ଅଛି ପ୍ରବାଦ ରୂପରେ

ବାସ ସ୍ଥାନ ରୂପେ ଘର ଯହିଁ ଥାଉ

ଅଚିହ୍ନା ହିଁ ସବୁଠାରେ