ଅବୁଝା ମନ

ମନର ଭାବନା ହୁଏ ବାଟବଣା

   ଘଡିକେ ଘଡି ବଦଳେ

ନୁହେଁ ପ୍ରଶମିତ ସଦା ଆକସ୍ମିକ

    ଅସ୍ଥିର ଯେ ସବୁବେଳେ ll

ଠିକି କରି ଶିଖେ ସାମୟିକ ଭାବେ

    ଚଞ୍ଚଳ ତାହାର ଗତି

ସ୍ଥାନ କାଳ ପାତ୍ର ପରିବେଶେ ସେତ

    ଦେଖାଏ ତାହାର ମତି ll

ଇନ୍ଦ୍ରିୟ ବାସନା  ମନର କାମନା

    ଅବୁଝାରେ ଚିରକାଳ

ଜିତେନ୍ଦ୍ରିୟ ଜାଣେ  ମନର ଚାବି ଯେ

    ଆୟତ୍ତର ପଶାଖେଳ ll

ମନର ଆବେଗ ନୁହେଁ କରାଗତ

    ପାଇଲେ ବଢ଼େଇ ନିଶା

ସନ୍ତୋଷ ଆନନ୍ଦ ପାଇବା ନିମନ୍ତେ

    ମନ ଖୋଜୁଥାଏ ବସା ll

ବୁଝେନା ଏ ମନ ବୁଝେନା କାରଣ

    ଅତୃପ୍ତ ତାହାର ବୀଜ

ପ୍ରଭୁ ପାଦେ ତାକୁ ବାନ୍ଧି ରଖିବାକୁ

    ବିବେକରେ ତାକୁ ହେଜ ll

ଅବୁଝା ଅବୁଝା ଶେଷ ଜୀବନଟା

     ଅବୁଝାରେ ରହିଯିବ

ପାଇବା ଲାଳସା ଭାଙ୍ଗିଲେ ତା' ଆଶା

     ପୂର୍ଣ୍ଣତା ଯେ ଆସିଯିବ ll