ଅଭିନୟ
ଅଭିନୟ
ଅଭିନୟ ତାର ସରିନି ଏଯାଏ
ଜବନିକା ପଡିଗଲା
ସଂଳାପ ସରିନି ସମୟ ହୋଇନି
ମଞ୍ଚ ତ ଅନ୍ଧାର ହେଲା ।
ଉପକ୍ରମଣିକା ଆରମ୍ଭ କରିଛି
କାଳକଲା ଉପଦ୍ରବ
ଲୁହ ଭରିଦେଲା ସବୁରି ଆଖିରେ
ତାର ମିଠା ସଉରଭ ।
କାହିଁକି କେଜାଣି ଅଭିନୟ ତାର
ସବୁ ମନ ନେଲା କିଣି
ସମୟ ସତେକି ସହି ପାରିଲାନି
ପକାଇଲା ତାକୁ ଖୁଣି ।
ଆଖିଏ ସପନ ଅଧା ରହିଗଲା
ପାହିବା ଆଗରୁ ରାତି
ଉଠିଲାନି ସିଏ ଉଠାଇବ କିଏ
ଅକାଳ କରିଛି ସାଥୀ ।
ଅଳପ ଦିନରେ ଗଳପ ଅନେକ
ପୋଥିଟିଏ ହୋଇଗଲା
ଭଲ ପାଇବାର ଆଶାଦେଇ କେତେ
ଭୁଲେଇ ସେ ଚାଲିଗଲା ।