ଆଶା

ପୁଣି ଏମିତି ଏକ ସକାଳ ଆସିବ, 

ଔଷଧ ଦୋକାନ ଆଗରେ ନୁହେଁ, 

ଚା ଦୋକାନ ଆଗରେ ଭିଡ଼ ଜମିବ । 

ପୁଣି ଏମିତି ଏକ ଅପରାହ୍ନ ଆସିବ, 

ସ୍କୁଲ ପଡ଼ିଆରେ ବୁଲାକୁକୁରଙ୍କ ଚିତ୍କାର ନୁହେଁ,

ପିଲାମାନଙ୍କ କଳରବ ଶୁଭିବ । 

ପୁଣି ଏମିତି ଏକ ସଂଜ ଆସିବ 

ଛକମୁଣ୍ଡରେ ପୋଲିସର ଗାଡ଼ି ନୁହେଁ, 

ପ୍ରିୟ ବନ୍ଧୁମାନେ ଦିଶିବେ । 

ପୁଣି ଏମିତି ଏକ ରାତି ଆସିବ, 

ଆମ୍ବୁଲାନ୍ସ୍‍ର ସାଇରନ୍‍ ଶବ୍ଦରେ ନୁହେଁ, 

ଚୁଡ଼ିର ରୁଣୁଝୁଣୁରେ ନିଦ ଭାଂଗିବ । 

ପୁଣି ଏମିତି ସମୟ ଫେରି ଆସିବ, 

ହାଉସ୍‍ଫୁଲ ବୋର୍ଡ ହାସପାତାଳ ଆଉ ଶ୍ମସାନରେ ନୁହେଁ-

ସିନେମାହଲ୍‍ରେ ଲାଗିବ । 

ପୁଣି ଏମିତି ଏକ ସମୟ ଫେରି ଆସିବ, 

ଗଙ୍ଗାରେ ଶବ ନୁହେଁ, 

ଓଁକାର ଧ୍ୱନି ପହଁରିବ । 

ପୁଣି ଏମିତି ଏକ ସମୟ ଫେରିଆସିବ, 

ମଣିଷ ସିଲିଣ୍ଡରରୁ ନୁହେଁ, 

ଖୋଲା ପବନରୁ ଅମ୍ଳଜାନ ନେବ । 

ପୁଣି ଏମିତି ଏକ ସମୟ ଫେରିଆସିବ, ବନ୍ଧୁ ମିଳନ ହବ। 

ମଣିଷ କେବଳ ଜୀଇଁବନି ବଞ୍ଚିବ ।