ଆମ ନୂଆ ରାଜଧାନୀ
ଆମ ନୂଆ ରାଜଧାନୀ
ଯହିଁ ବିରାଜିତ ସ୍ୱର୍ଗରାଜ୍ୟୁ ଚ୍ୟୁତ
ଦେବ ବିହାର କାନନ
କେନ୍ଦ୍ରେ ଉଚ୍ଚଇଶ୍ରବା ପୁଣି ବିରାଜିତ
ସ୍ଵୟଂଭୂ ଶ୍ରୀ ପଞ୍ଚାନନ l
ଭୁବନେ ସୁନ୍ଦର ନଗର ବିଖ୍ୟାତ
ନଗର ମଧ୍ୟରେ ରାଣୀ
ଭୁବନେଶ୍ୱର ସେ ଏକାମ୍ର ନଗରୀ
ଆମ ନୂଆ ରାଜଧାନୀ l
ଆଜି ଦିବସରେ ମନେ ପଡ଼ିଯାଏ
ଖୋକା ଭାଇଙ୍କ ସେ ଗୀତ
ଯେ ଗୀତ ବତାଏ ନୂଆ ରାଜଧାନୀ
ବର୍ତ୍ତମାନ ଓ ଅତୀତ l
ଆଗେ ଥିଲା ବାଘ ଭାଲୁ ଭରା ଏହି
ଅଗନା ଅଗନି ବନ
ଦେଏଖେ ସୁକୁଟା ବୋଉଲୋ ବିଞ୍ଚୁଣି
ନଳ ବୁଲେ ଘନ ଘନ l
ପ୍ରାଚୀନ କାଳର ଅଧ୍ୟାତ୍ମ ନଗରୀ
ନାମ ତ୍ରି ଭୁବନେଶ୍ୱର
ଲିଙ୍ଗରାଜ ହେତୁ ବିଖ୍ୟାତ ଜଗତେ
ଏବେ ଏ ଭୁବନେଶ୍ୱର l
ଅପୂର୍ଵ ତୋରଣ ମୁକ୍ତେଶ୍ଵର ଠାରେ
ସଭିଙ୍କୁ କରେ ସ୍ୱାଗତ
ମନ୍ଦିର ମାଳିନୀ ନଗର ନାମରେ
ବିଶ୍ୱ ଦରବାରେ ଖ୍ୟାତ l
ଆଶୀର୍ବାଦ ଯାଚି ଦେଉଛନ୍ତି ଏଠି
ପ୍ରଭୁ ଶ୍ରୀ ଭାସ୍କରେଶ୍ୱର
ରାମ ରୂପେ ଶିବ ଶିରି ରାମେଶ୍ୱର
ଆବର କପିଳେଶ୍ୱର l
ଏକାମ୍ର କ୍ଷେତ୍ରରେ ଠାବେ ଠାବେ
ରାଜେ ଅପୂର୍ଵ କଳାର କିର୍ତ୍ତୀ
କଳାର ଦେଶ ଏ ଉତ୍କଳ ଆମର
ଉତ୍କଳ ଶିଳ୍ପୀଙ୍କ କୃତି l
ଏ ମାଟି ବିଖ୍ୟାତ ଅଶୋକା ଅଷ୍ଟମୀ
ରୁକୁଣା ରଥ ଯାତରା
ବିନ୍ଦୁସର କୁଳେ ଶ୍ରୀ ଅନନ୍ତ ଶାୟୀ
ଦିଅନ୍ତି ଦିବ୍ୟ ଇସାରା l
ରାଜାରାଣୀ ପ୍ରେମ ମନ୍ଦିର ଦର୍ଶନେ
ଆନନ୍ଦ ହୁଅଇ ଚିତ୍ତ
କେଦାର ଗୋଉରୀ ବତାଏ ଆମ୍ଭକୁ
ପ୍ରେମର ମହା ସଙ୍ଗୀତ l
କଳିଙ୍ଗ ଯୁଦ୍ଧର ବିଭୀଷିକା ସାକ୍ଷୀ
ଆମ୍ଭ ଧଉଳି ପାହାଡ଼
ଚଣ୍ଡାଶୋକ ଯହିଁ ଧର୍ମାଶୋକ ହେଲେ
ତେଜି ତରବାରୀ ଦାଢ଼ l
ଖଣ୍ଡଗିରି ପୁଣି ଉଦୟ ଗିରି ଏ ଅପୂର୍ବ
ତା କିର୍ତ୍ତୀ ରାଶି
ଜୀନାସନ ଯହିଁ ଉଦ୍ଘୋଷଣା କରେ
ଖାରବେଳ କୀର୍ତ୍ତି ଘୋଷି l
ଆମ ନୂଆ ରାଜଧାନୀ ଏବେ ଜଣା
ବିଶ୍ୱରେ ବିଦ୍ୟା ନଗରୀ
କି ଯୋଗରେ ଏହା ପ୍ରତିଷ୍ଠା ଲଭିଲା
ବିସ୍ମୟ ଲାଗଇ ଭାରି l
ଉଣେଇଶ ଅଡ଼ ଚାଳିଶ ମସିହା
ଅପ୍ରେଲ ତାରିଖ ତେର
ଦି ହଜାର ବର୍ଷ ଐତିହ୍ୟ ସହର
ନୂଆ ରାଜଧାନୀ ମୋର l
ପ୍ରତିଜ୍ଞା କରିବା ରାଜଧାନୀ ବାସୀ
ମିଳି ସର୍ବ ନର ନାରୀ
ସର୍ବାଙ୍ଗ ସୁନ୍ଦର ଗଢ଼ିବା ଏହାକୁ
ବିଶ୍ୱରେ ବିସ୍ମୟ କରି l
ପ୍ରଭୁ ଲିଙ୍ଗରାଜ ବସିଛନ୍ତି ଦେବେ
ନିଶ୍ଚେ ସେ ଅଭୟ ବର
ଏ ପବିତ୍ର ଦିନେ ରାଜ୍ୟବାସୀ ମିଳି
କର ତାଙ୍କୁ ନମସ୍କାର l