ଆମ ବାପୁ

ପବିତ୍ରଭାରତ ବର୍ଷେ ଜନ୍ମିଥିଲେ

ମହାତ୍ମା ବାପୁଜୀ ଆମ

ଅହିଂସାର ମନ୍ତ୍ର ସତ୍ୟ ନ୍ୟାୟ ପଥ

ବାଣ୍ଟିଥିଲେ ସୂର୍ଯ୍ୟ ସମ |

ଅଠର ଶହ ଅଣସ୍ତୁରୀ ମସିହା

ଦୁଇ ଅକ୍ଟୋବର ଦିନ

ପିତା କରମଚାନ୍ଦ ପୁତୁଲି ବାଇ ମା

କୋଳ କରିଲେ ମଣ୍ଡନ |

ମୋହନ ଦାସ କରମ ଚାନ୍ଦ ଗାନ୍ଧୀ

ସମ୍ପୂର୍ଣ୍ଣ ନାମ ତାଙ୍କର

ଅତି ଲାଜୁକୁଳା ପାଠରେ ଦୁର୍ବଳ

ତେର ବର୍ଷେ ବିଭାଘର |

କସ୍ତୁରବା ସେ ଧର୍ମପତ୍ନୀ ତାଙ୍କ

ସହକର୍ମୀ ସାଥି ଥିଲେ

ରବୀନ୍ଦ୍ରନାଥ ଟ୍ୟାଗୋର ଗୁରୁ ତାଙ୍କୁ

ମହାତ୍ମା ଉପାଧି ଦେଲେ |

)ଓକିଲାତି ପଢି ବିଦେଶୁ ଫେରିଲେ

ଦେଶ ସେବାରେ ତ ମନ

ଗୋରା ଶାସନରେ ଦମନ ଲୀଳାକୁ

ଦେଖି କଲେ ଆନ୍ଦୋଳନ |

କଳା ଗୋରା ଭେଦଭାବକୁ ଦୁରେଇ

ଅସ୍ପୃଶ୍ୟତା ନିବାରଣ

ଆଇନ ଅମାନ୍ୟ ଅସହଯୋଗ ତ

କଲେ ଏକତା ହୋଇଣ |

ଲାଠିମାଡ଼ ଖାଇ କରାଗରେ ରହି

ଜନ ଜାଗରଣ କଲେ

ଭାରତ ଛାଡ଼ ଡାକରାରେ ଦିନେ

ଗୋରା ଶାସକ ଫେରିଲେ |

ଦାନବୀର ହରିଶ୍ଚନ୍ଦ୍ରପୁଣି ସେ ତ

କଥା ଶ୍ରବଣ କୁମାର

ଅନୁପ୍ରାଣିତ ସେ ଶୁଣି ହୋଇଥିଲେ

ସତ୍ୟ ଧର୍ମ ଏକା ସାର |

ବିଦେଶୀ ବସ୍ତ୍ର କୁ ବର୍ଜନ ଆହ୍ୱାନ

ନିଜେ ପିନ୍ଧିଲେ ଖଦଡ଼

ନ ଦେଖି ନ ଶୁଣି ନ କହି ଖରାପ

କଥା ସେ ତିନି ମାଙ୍କଡ଼ |

ରାମ ରାଇଜ ତ କରିବେ ଦେଶକୁ

କରିଥିଲେ ବାପୁ ପଣ

ଅଧୁରା ରହିଲା ଆତତାୟୀ ଗୁଳି

ବାଜି ତୁଣ୍ଡେ ହା ରାମ | |

କହିଥିଲେ ବାପୁ ଯେଉଁଦିନ ନାରୀ

ରାତି ଅଧେ ବାହାରିବେ

ସେ ଦିନ ଏ ଦେଶୁ ଦୁଃଖ ଦୂର ହେବ

ଶାନ୍ତିରେ ନର ବଞ୍ଚିବେ |

ଫେରିଆସ ବାପୁ ଜନ୍ମଭୂମି ଡାକେ

ଗଢ଼ିବ ସୁନାର ଦେଶ

ଜଗତର ଗୁରୁ ହେବ ଆମ ଦେଶ

ଜଗତେ ରହିବ ଯଶ |

ଜାତିର ଜନକ ଶତାବ୍ଦୀ ପୁରୁଷ

ହୋଇଛନ୍ତି ସେ ଅମର

ତାଙ୍କୁ କୋଳେ ପାଇ ଧନ୍ୟ ଏଇ ଭୂମି

ରଖିଲେ ଟେକ ଦେଶର |