ସ୍ମୃତିରେ ବର୍ଷା
ସ୍ମୃତିରେ ବର୍ଷା
ଅତୀତର ସେଇ ବର୍ଷା ଭିଜା ଦିନ
ଉଙ୍କିମାରେ ସ୍ମୃତି ଇଲାକାରେ
ପହିଲି ବରଷା ଭିଜା ମାଟି ବାସ୍ନା
ଅମୋଦିତ ତନୁ ମନ କରେ
ସେଦିନ ଆଜିବି ମନେ ପଡି ହୁଏ
ଆନମନା ଦେଖି ବରଷାକୁ
ସାଧବବୋହୂକୁ ଧରିବାର ଖୁସି
ସାଥେ କରକାକୁ ଖାଇବାକୁ
ଭିଜିବାକୁ ଟିକେ ବରଷା ପାଣିରେ
ମନ ଛଟପଟ ହେଉଥାଏ
କାଗଜ ଡ଼ଙ୍ଗା ଭସାଇବା ପାଇଁ
ଛପି ଛପି ଓଳି ତଳ ଧାଏଁ
ସାଙ୍ଗ ସାଥି ହୋଇ ନଈକୁ ଗାଧୋଇ
ଯାଇଥିଲୁ ଏକ ବର୍ଷା ଦିନେ
କୁଆଡେ ଥିଲା ସେ କଳା ବଉଦଟା
ଘୋଟି ଆସିଥିଲା ଚାରି କୋଣେ
ଚପଳା ଚମକେ ଅଶନୀ ଶବଦେ
ଛାତି ଥରିଗଲା ସଭିଙ୍କର
ଟପ ଟପ ବର୍ଷା ସାଥିରେ କରକା
ଆସି ଦେହେ ବାଜି କଲବଲ
ପ୍ରଭଞ୍ଜନ ବେଗ ଅତୀବ ପ୍ରଖର
ଉଡାଇ ନେଉଥିଲା ଆମକୁ
ଜୀବନବିକଳେ ଧାଇଁଲୁ କଷ୍ଟରେ
ନଈକୂଳ ଆମ୍ବ ତୋଟାକୁ
ଆଖିରେ ବାଲି ବର୍ଷା ଭିଜା ଦେହ
ଶୀତେ ହେଉଥିଲୁ ଥୁରୁ ଥୁରୁ
ବରଷା ଛାଡିଲା ଇନ୍ଦ୍ରଧନୁ ଦେଖି
ସଂଜରେ ଘରକୁ ଫେରିଥିଲୁ
ସେଇ ବର୍ଷାମାଡ଼ ମନେପଡେ ସଦା
ଥିଲେ ବି ବୟସ ଅପରାହ୍ନେ
ପ୍ରକୃତିର ଲୀଳା ଅତୀବ ବିଚିତ୍ର
ଚକ୍ରବତ ସୁଖ ଦୁଃଖ ଯେହ୍ନେ |