Library
Profile
ଆଜି ମୁଁ ଜଳୁଛି
ଆଜି ମୁଁ ଜଳୁଛି
ମୋ ଆତ୍ମା ଜଳୁଛି
ମୋ ଶରୀର ଜଳୁଛି
ମୋ କାୟା, ମନ ସବୁ ଜଳୁଛି
ଆଜି ମୁଁ ଜଳୁଛି ।
ଶ୍ମଶାନ ଘାଟେ
କ'ଣ ମୋ ଜଳିବା ପାଇଁ
ମୋତେ ଜାଳିବା ପାଇଁ
ଜାଗା ଟିକେ ମିଳୁଛି ?
ତଥାପି ଆମ ନେତାଏ କହୁଛନ୍ତି
ଏ ଦେଶ କୁଆଡ଼େ ବିକାଶ କରୁଛି
ପ୍ରଗତି, ଉନ୍ନତିର ନାରା ଦେଇ
ଏଠି ନେତା ହସୁଛି
ଜନତା ବାପୁଡାର
ସଂସାର ଭାସୁଛି
କାହାର ସ୍ତ୍ରୀ, କାହାର ସ୍ଵାମୀ
କାହାର ପିତା, କାହାର ପୁତ୍ର
କାହାର କନ୍ୟା
ମରଣ ଯୁଇକୁ ତା'ର
ଶବ ଆସୁଛି
ଏ ଦେଶର
ଦାୟିତ୍ଵବାନ୍ ଜନ ପ୍ରତିନିଧି
ଭାଷଣ ବାଜି ମାରି
ଭୋଟ୍ ପାଇଁ ଆସୁଛି
ଭୋଟ୍ ଶେଷେ
ଜନତାର ସୁଖ ଦୁଃଖ ନ ବୁଝି
ତା କଥାରେ ନେତା ହସୁଛି ।
ଚକ ବନ୍ଦ୍, ଅଖ ବନ୍ଦ୍
ଫୁସ୍ ଫୁସ୍ ବନ୍ଦ୍, ହୃତ୍ ପିଣ୍ଡ ବନ୍ଦ୍
ଜୀବନ ବନ୍ଦ୍, ଜୀବିକା ବନ୍ଦ୍
ରୋଗୀ ପାଇଁ ଚିକିତ୍ସାଳୟରେ
ଖଟିଆ ବନ୍ଦ୍, ଖଟ ବନ୍ଦ୍
ହେଲେ ଆମ ନେତାଙ୍କ ପାଇଁ
ହେବନି କେବେ ଭୋଟ୍ ବନ୍ଦ୍ ।
ଆମେ ବିକାଶ କରୁଛୁ
ସରକାରୀ ସଂସ୍ଥାକୁ
ଘରୋଇକରଣ କରି
ସେଥିରୁ ମୁନାଫା ଖୋଜୁଛୁ
ଜନତା ବାପୁଡାର
ଜୀବନ, ଜୀବିକା ସହ
ଖେଳ ଖେଳୁଛୁ
ପୁଞ୍ଜିପତି, ଉଦ୍ୟୋଗପତିଙ୍କୁ
ଖୁସି କରାଇ
ଭୋଟ୍ ପାଇଁ ଦଳୀୟ ପାଣ୍ଠି
ଆଦାୟ କରୁଛୁ ।
ଆମେ ନେତା ଦିନୁଁ ଦିନ
ଆମର ଭୋଟ୍ ଭୋକ ବଢୁଛି
ହେଲେ ଏ ଦେଶର
ମୁଁ ସାଧାରଣ ଜନତା
ଆଜି ମୁଁ ଜୀବନ ପାଇଁ
ଜୀବିକା ପାଇଁ
ଚିକିତ୍ସା ପାଇଁ
ଶବ ଜାଳିବା ପାଇଁ
ଏନ୍ତୁଡିଶାଳରୁ ଶ୍ମଶାନ ଘାଟ ଯାଏଁ
ସବୁଠି ସବୁ କ୍ଷେତ୍ରେ
ଆଜି ମୁଁ ଜଳୁଛି ।
