ଆଜି ଏ ସାଧାରଣତନ୍ତ୍ର ଦିବସେ

ଆଜି ଏ ସାଧାରଣତନ୍ତ୍ର ଦିବସେ,

ଜାତୀୟ ପତାକା ଉଡଇ ମୋ ଦେଶେ।

ଦେଶ ବାରେ ତିଳେ କହିଦେଇ ପଦେ,

ଉଡାଏ ପତାକା କେଡେ ମୁଁ ଆନନ୍ଦେ ।

ଆଜ ଏଇ ଦିନ ତ୍ରିରଙ୍ଗା ତଳେ,

ଶପଥ ନିଏ ମୁଁ ଦେଶ ଜନ ମେଳେ।

ସତ୍ୟ ପଥେ ଚାଲି ଅହିଂସା ଆଚରି,

କରିବି କର୍ତ୍ତବ୍ୟ ଏ ଜୀବନ ଭରି।

ଅଧିକାର ପାଇଁ ଯେତେ ମୁଁ ଚିନ୍ତିତ,

କର୍ତ୍ତବ୍ୟ ପାଇଁ ମୁଁ ନୁହେଁ ଏତେ ବ୍ୟସ୍ତ।

କିମ୍ପାଇଁ ଶପଥ କରିଥିଲି ମୁହିଁ,

ନିଜକୁ ଥରେ ମୁଁ କଳି ନାହିଁ ଯହିଁ।

ଆଜି ଏ ସାଧାରଣତନ୍ତ୍ର ଦିବସେ,

ସ୍ୱାର୍ଥ ଆଉ ଅର୍ଥ ନୟନେ ମୋ ଭାସେ।

ସ୍ୱାର୍ଥ ପଛେ ଧାଇଁ ଦେଶ କଥା ଭୁଲି,

ନିଜ କଥା ଭାଳି ଆଗେ ଯାଏ ଚାଲି ।

ନେତାଜୀ, ବାପୁଜୀ ଭଳି କେତେ ନେତା,

ସାଥେ ଥିଲେ କେତେ ମୋ ଦେଶ ଜନତା ।

କେତେ କ୍ଳେଶ ସହି ଅତ୍ୟାଚାର ପାଇ,

ଦେଶ ସ୍ୱାଧୀନତା ଆଣିଥିଲେ ଯାଇ।

ଦେଖି ବିଶ୍ୱ ଜନେ ସ୍ୱାଧୀନ ଭାରତ,

ନିଜ ନିଜ ଦେଶେ ଗଢ଼ିଥିଲେ ପଥ।

ଯେ'ଦେଶ ଦେଖାଏ ବିଶ୍ୱେ ମୁକ୍ତି ମାର୍ଗ,

ସେ'ଦେଶେ ଜନତା ଆଜି ଭାଗ ଭାଗ।

ଆଜି ଏ ସାଧାରଣ ତନ୍ତ୍ର ଦିବସେ,

ଗଣତନ୍ତ୍ର ଆଜି ବନ୍ଧା ନେତା ପାଶେ।

ଜନତା ଶାସନ ଗଣତନ୍ତ୍ର ଦେଶେ,

ଚାଲେ ନାହିଁ ଏଠି ଆମରି ସକାଶେ।

ମତ ମୂଲ ଭୁଲି ଆମେ ମତଦାନେ,

ମଦ ପ୍ରେମେ ବାଇ ହେବା ଯେତେ ଦିନେ ।

ସେଯାଏଁ ଏଦେଶେ ଜନତା ଶାସନ,

ନେତା ପାଶେ ବନ୍ଧା ପଡିଥିବ ଧନ।

ବିକାଶ ବଦଳେ ହୋଇବ ବିନାଶ,

ପରାଧୀନତା ଯେ କରୁଥିବ ଗ୍ରାସ।

ଅନ୍ଧାର ରଜନୀ ଆସିବ କି ପାହି,

ସ୍ୱାର୍ଥ ପଛେ ଯହିଁ ଥିବା ଆମେ ରହି।

ଆଜି ଏ ସାଧାରଣତନ୍ତ୍ର ଦିବସେ,

ନିଜ ମନକୁ ଥରେ ପଚାରି ଆସେ।

ଦେଶୁ ଦିନେ ମୁହିଁ ପାଇଚି ଯେ ଯାହା,

ସେଥୁ ତିଳେ ଋଣ ଶୁଝିଚି କି ତାହା ।

କେଡେ ମୁଁ କୃତଘ୍ନ ତେବେ ଏଇ ଦେଶେ,

କାହିଁ ଜନମିଛି ଏଠି ନର ବେଶେ।

ବର ଜୀବ ଭାଳି ଗଢ଼ିଥିଲେ ସାଇଁ,

ଏ କି' ବରପଣ ବୁଝି ହୁଏ ନାହିଁ।

ଛାଡି ପରଦୋଷ ନିଜକୁ ପଚାର,

କର୍ତ୍ତବ୍ୟ କରିଚ ତୁମେ କେତେ ଦୂର ।

ବଦଳିଲେ ବ୍ୟକ୍ତି ବଦଳିବ ଜାତି,

ବଦଳିଲେ ଜାତି ହସିବ ଏ'ମାଟି।