ଆଜି ଏ ସାଧାରଣତନ୍ତ୍ର ଦିବସେ

ଆମେ କରୁଅଛୁ ଆମରି ଶାସନ

    ସ୍ୱାଧୀନ ଭାରତ ବର୍ଷେ,

ଆମରି ଇଚ୍ଛାରେ ଶାସକ ବାଛୁଛୁ

    ଯାହା ହିତ ହୁଏ ଦେଶେ |

ଗଣତନ୍ତ୍ର ଏକ ଶାସନ ପଦ୍ଧତି

    ସାଧାରଣ ଲୋକ ରାଜ,

ବିଶ୍ୱେ ବହୁଦେଶ ଆପଣାଇଛନ୍ତି

    ହୋଇଛି ଯେବେ ସ୍ୱରାଜ |

ଅଛି ସମ୍ବିଧାନ ଶାସନ ପାଇଁ ଯେ

   ଆଇନର ଗନ୍ତାଘର,

ସକଳ ନିୟମ ଲେଖା ହୋଇଅଛି

   ଯାହା ସବୁ ଦରକାର |

ଆମେରିକା,ଫ୍ରାନ୍ସ,ଇଂଲଣ୍ଡ, ଭାରତ

   ଏପରି ଅନେକ ଦେଶ,

ଚାଲିଛି ନିର୍ବିଘ୍ନେ ସାଧାରଣ ତନ୍ତ୍ର

   ଉଡାଇ ନିଜର ଯଶ |

ଲୋକମାନଙ୍କର ଲୋକଙ୍କର ଦ୍ୱାରା

   ଲୋକମାନଙ୍କର ପାଇଁ,

ଏ ଗଣତନ୍ତ୍ରର ଗଜଲ ପରା ଯେ

   ଇତିହାସ ଯାଏ ଗାଇ |

ଦେଶ ନାଗରିକ ଭୋଟ ଜରିଆରେ

    କରିଥାନ୍ତି ନିର୍ବାଚିତ,

ନିର୍ବାଚିତ ଜନ ପ୍ରତିନିଧି ମାନେ

    ପାଆନ୍ତି ଶାସକ ପଦ |

ଗଣତନ୍ତ୍ର ଦିଏ ନାଗରିକେ ତାର

    ମଉଳିକ ଅଧିକାର,

ରହିଛି କର୍ତ୍ତବ୍ୟ ଦେଶପାଇଁ କିଛି

   ପ୍ରତ୍ୟେକ ନାଗରିକର |

ଆସିଥାଏ ଯେବେ ଦେଶ ପରେ ମାଡି

   ପ୍ରାକୃତିକ ବିପର୍ଯୟ,

ସାହାଯ୍ୟର ହାତ ବଢ଼ାଇ ଥାଆନ୍ତି

   ଶାସକ ହୋଇ ସଦୟ |

ହୋଇଥାଏ ଦେଶେ ଲୋକଙ୍କର ସେବା

   ଶିକ୍ଷା, ସ୍ୱାସ୍ଥ୍ୟ, କୃଷି ପାଇଁ,

ରାସ୍ତାଘାଟ ସହ ଦେଶର ସୁରକ୍ଷା

   କରନ୍ତି ଭରସା ଦେଇ |

ଯେତେ ବି ଶାସନ ଅଛି ଭିନ୍ନ ଭିନ୍ନ

   ଶ୍ରେଷ୍ଠ ଅଟେ ଗଣତନ୍ତ୍ର,

ଗଣତନ୍ତ୍ରର ଏ ଗଜଲ ଗାଉଛି

   ଶୁଣ ଏକତାର ମନ୍ତ୍ର |