ଆଗୋ ନାରୀ

ଆଗୋ ନାରୀ

ଆଗୋ ନାରୀ ତୁମେ ଅଗ୍ନି ସ୍ଵାକ୍ଷରା

 ତୁମେ ଉଜ୍ଜ୍ଵଳ ଵରଣା

ଶାଶ୍ଵତ ତୁମେ ମହାକାଳ ତୁମେ

ତୁମେ ଆଦରିଣୀ ଝରଣା

ତୁମେ ପାଲଟିଲେ ଵସୁମତୀ ଉତ୍ସ

ଝଞା କୁହଇ କଥା

ପ୍ରଳୟ ରଚଇ ତୁମ ଛାତି ପରେ

ଚହଟଇ କେତେ ବ୍ୟଥା

ଶୁଷ୍କ ଵଦନ ରୁକ୍ଷ ଚେହେରା

ବିହଗିନୀ ଲୁହ ଢାଳେ

ବୈଶାଖ ଯେଵେ ଦୁର୍ଦ୍ଦଶା ଆଣେ

ତନୁରେ ଅଗ୍ନି ଜଳେ

ତୁମେ ସୁନୟନା ତୁମେ ପ୍ରିୟତମା

ତୁମେ ତ ଅର୍ଦ୍ଧାଙ୍ଗିନୀ

ତୁମେ ସୁହାସିନୀ ଲୀଳା ବିଳାସିନୀ

 ତୁମେ ଅଟ ବିଜୟିନୀ

ବାରବଧୂ ତୁମେ ଅମ୍ବାପାଲୀ

 ଗୋ ପିଙ୍ଗଳା ତୁମେ ନାରୀ

ରୁଦ୍ରାଣୀ ତୁମେ ମୃତ୍ୟୁର ଶ୍ଳେଷ

ଦେଇପାର ମନ ଭରି

 ଉଲ୍କା, ଉର୍ମି ,ମେଘ ମୌସୁମୀ

ମାୟାବିନୀ ତୁମେ ନାରୀ

କାମନା କାୟାର ପୂର୍ଣମୀ ଜହ୍ନ

ମାନିନୀ ହୃଦୟ ରାଣୀ

ତୁମେ ମୃତ୍ତିକାରେ ନିର୍ଵାଣ

 ଦିଅ ତୁମେ ଜାହ୍ନଵୀ ଧାରା

ଦୈତ୍ୟ ଦଳିନୀ,ପାପ ସଂହାରିଣୀ

ମଧୁମତି ମଧୁକ୍ଷରା