वाटतो अभिमान

वाटतो अभिमान मज

देश भारत असे महान

देशभक्तांनी देशासाठी

अर्पिला आपुला प्राण

सोडूनी घरदार लढले

घेऊनी तळहाती शीर

करून संसाराची होळी

गेले फासावर ते वीर

त्याग, सत्य, अहिंसेचाही

आहे देशाचा इतिहास

शोर्य क्रांतीने स्वातंत्र्याचा

तिरंगा फडकला नभात

विविधेतून एकतेचा देई

जगाला संदेश निराळा

असा भारत देश माझा

सुजलाम जगात वेगळा

राहो अबाधित स्वातंत्र्य

ठेवू मनात अभिमान

अमृत महोत्सव साजरा

करू गाऊ स्वातंत्र्य गान