तू तिथे मी

तू तिथे मी सदैव साक्ष

प्रकाशाचे वलय सुर्याला

सीमाच नाही ती कसली

प्रिये तुझ्या औदार्याला

तू तिथे मी भासणार

क्षितीज धरेला जणू बोले 

विलोभनीय दृश्य सखी

सायंकाळी मन डोले

तू तिथे मी बहरेन असा

ताटवा फुलांचा फुलला

गंध दरवळता सर्वत्र 

मधु प्राशना भ्रमर गुंतला

तू तिथे मी साथीला जणू

शब्दांना सूर गवसला

छेडताच वीणा बघ

मधूर स्वर निनादला

तू तिथे मी एकरूप 

राधेचे मन होई दंग

बासरीचा घुमता नाद

कान्हाचा लाभता संग

तू तिथे मी रमतो

नाते आपुले छान

अबोल भावना अंतरी

सखी हरपते माझे भान