जीवन गाणे

जीवन गाणे येणे जाणे अनंता

मोक्षासाठी जन्म प्राक्तन सारे

पुनरपि साखळी होवो खंडीत

यत्किंचित जीवा भोग पसारे

ओळखशील ना समर्पित भाव

भक्तीची ओंजळ झिजली काया

जीवनी भाग्याची वसंत बहार

धन्य जगणे तुझी कृपा छाया

रचत मायाजाल घेतोस परीक्षा

नेत्रात क्षीण प्राण नको शिक्षा

नेई नेई रे सोबत अंती श्रीरंगा

तव नाम दिक्षा दर्शन प्रतिक्षा

प्रपंच कशाचा करू भाव गहिरा

यातायाती तुटावे क्षणी मायापाश

मुक्ती याचनी फडफडे रे पाखरू

भाळी कैवल्याचा चैतन्य प्रकाश

मन गाभाऱ्यात नंदादीप तेजस्वी

कृष्णा मनोहर रूप चित्ती सुदैव 

शरयू तीरावर घे सत्कर्माचे अर्ध्य

तव चरणी अर्पण आत्मफूल दैव