पहिली भाऊबीज
पहिली भाऊबीज
तो एकटा पोरका
कोणी नाही जिवलग
कधी उरी अचानक
त्याच्या असे तगमग
रानवट वृक्षापरी
तो वाढला सहज
आता तरारून आला
कळू लागे प्रेम,लाज । 1 ।
तो मिसळे लोकात
कधी हसतो खेळतो
रात्र उदास असते
निद्रेसाठी तरसतो
सणवार येती जाती
याला सगळे पारखे
सुख दुःख हार जीत
जणू सगळे सारखे । 2 ।
यंदा भाऊबीज दिनी
एक शेजारची पोर
याच्या दाराच्या समोर
रांगोळीते चंद्रकोर
तिन्ही सांजेला जवळ
दोन पणत्या लावते
त्याच्या नकळत त्याची
अशी दिवाळी सजते । 3 ।
एका बेहोशीत जणू
तो बाजारात गेला
रंगीतशा कागदाचा
तिच्या हाती पुडा दिला
तिच्या म्हाताऱ्या आईने
एक दीप तेजाळला
पहिला भाऊबीज सण
आज दोघात सजला ।4 ।