ओढ पावसाची

ओढ पावसाची,

रिमझिम सरींची

ओल्या तुझ्या मिठीतल्या 

त्या जादुगिरीची

ओल्या दवात न्हाते,

मन मंत्रमुग्ध होते

मृदू-गंधाची जादू,

आसमंती विखुरते

व्याकुळ करते का मनाला?

ही अधीरता पावसाची

तप्त धरेलाही असते 

ओढ जणू याच क्षणाची

इंद्रधनुच्या रंगामध्ये, 

मन हे कसे रंगीत होते

टप-टप पडणाऱ्या थेंबांचे

सुमधुर कसे हे संगीत होते?

व्यापुन उरतो आसमंत सारा

ओढ पावसाची चरा-चराला

पाना-फुलांवर दवबिंदुंचे झुंबर

हिरवी मखमल जणू वावराला