नवे वर्ष -

सूर्य उगवतो हलके हलके

पुसत कालची रात्र

नव्या प्रकाशा सोबत आशा

इथे, तिथे सर्वत्र.

उलटुनी एका जुन्या दिनांका,

अंक नव्या दिवसाला,

आपण देतो, सोयीसाठी,

अर्थ फार ना त्याला.

दिवस जोडुनी दिवसाला, ते 

महिने महिने जाती,

बघता बघता आपण म्हणतो 

वर्षे येती जाती...

निसर्ग थोडा असे वेगळा

ऋतूंप्रमाणे फिरतो,

वर्षा, शरद नि हेमंताच्या 

हाती हातच देतो.

नंतर येतो शिशिरासंगे 

वसंत हा वेगळा,

नवा साज सृष्टीस देऊनी

करी नवा सोहळा.

तिथून होते सुरू चक्र हे,

चैत्रपालवीसवे,

आविष्कार असे सृजनाचा 

गीत गुंजते नवे.

पिढीजात आपल्या ज्ञानाची

हवी धराया कास,

आताच नुकते सांगुन गेले

वर्ष वीसशे वीस

'नवे' वर्ष हे या अर्थाने

आपण घेऊ या,

चैत्रपाडव्याला हर्षाची 

गुढी उभारू या.