Library
Profile
मला तुला मनातून काढायचं आहे
मला तुला मनातून काढायचं आहे
कोमेजण्या आधी देठापासून फुल
तोडायचं आहे
मला किनई तुला मनातून
काढायचं आहे ....
खरं सांगू !
तुझ्या माझ्यात असायचा फक्त तू
मला फुलविणारा हक्काचा ऋतू
तुझ्याशिवाय मला वाढायचं आहे
मला किनई तुला मनातून
काढायचं आहे ....
ऐकतोस ना !
विस्कटलंय मन जरा आवरून घेते
चुकता चुकता जरा सावरून घेते
कोपऱ्याकापऱ्यातून झाडायचं आहे
मला किनई तुला मनातून
काढायचं आहे ....
बघ ना !
मन उजवणारा सण तुझी आठवण
तुळशीविना अपूर्णच वृंदावन
तुटलेल्या मला माझ्याशी
परत जोडायचं आहे
मला किनई तुला मनातून
काढायचं आहे ....
समजलं ना !
सोडून जातांना चुकून आठवशील का ?
तुझाही एक ठोका चुकून पाठवशील का ?
अर्धवट लिहलेले नाव पूर्ण खोडायचं आहे
मला किनई तुला मनातून
काढायचं आहे ....
बोल ना !
माझ्यातल्या तुला वेचता येत नाही
किती किती सामावलाय मोजता येत नाही
काही नियम लिहतांना काही मोडायचं आहे
मला किनई तुला मनातून
काढायचं आहे ....
कळतंय ना !
