कान्होबा खेळ खेळू रानीं

कान्होबा खेळ खेळू रानीं । तुम्हीं आम्हीं दोघे मिळोनी ॥१॥

हमामा रे भाई हमामा ॥धृ॥

हमामा घाली मत्स्य अवतारी । शंखासुरा धरुनी मारी ॥२॥

हमामा घाली समुद्रतीरीं । धरुनी पर्वत पाठीवरी ॥३॥

हमामा घाली नानापरी । पृथ्वी धरुनी दाढेवरी ॥४॥

हमामा घाली हिरण्य कश्यपाघरीं । प्रगटुनी स्तंभामाझारीं ॥५॥ .

हमामा घाली बळीचे द्वारीं । आपण होऊनि भिकारी ॥६॥ .

हमामा घाली परशु हातीं । निःक्षात्री पृथ्वी केली जगतीं ॥७॥

हमामा घाली लंकेवर । केला बिभीषण राज्यधर ॥८॥

हमामा घाली नंदाघरीम । गोपाळ नाचती गजरीं ॥९॥

हमामा घाली भीमातटीं । उभाचि धरुनि कर कटीं ॥१०॥

एका जनार्दनी खेळ । नानापरीचा आकळ ॥११॥