जर नसतील मुली.

उमलण्या आधीच कळी l

नका ना तोडू तुम्ही ll

जन्माआधीच मुलीला l

नका मारू कुणी ll १ll

मी जर नसेल तर l

काय असेल भविष्य ll

पांचालीच्या पांडवांसमान l

होऊन जाईल आयुष्य ll २ll

येतील फक्त मुलेच जन्मा l

मुली कुठेच दिसणार नाहीत ll

निसर्गाचा जर नियम मोडला l

तर आया बहिणीच उरणार नाहीत ll ३ll

जर नसतील कुठेच मुली l

सासर माहेर ही नसेल ll

सणांची रे रेलचेल l

फक्त पुस्तकांत आता दिसेल ll ४ll

माय लेकीच्या भेटीचा l

सोहळा दिसणार नाही ll

राखी बांधायला हाती l

कुणाला बहीण उरणार नाही ll ५ll

चेहरा सुनेचा कधीच l

यापुढे दिसणार नाही ll

नातवांसोबत खेळण्याचा आनंद l

म्हातार्‍यांना मिळणार नाही ll ६ll

आहे गरज काळाची l

मुलगी येऊ द्या जन्मा ll

सारी नाती गोती तीच तर l

जन्मा घालते रे पुन्हाll ७ll