जीवन एक संघर्ष

क्षणभराचं हे जीवन मात्र

किती सहन करावं लागतं

देह मातीचा पुतळा जरी,

देह दहन करावं लागतं

कधी सुख तर कधी दु:खाला कवटाळत

इथं सारंच झेलावं लागतं

जगण्या-मरण्याच्या प्रवासात 

कधी वेदनेलाच पेलावं लागतं

नसता अपेक्षा कसली 

सारंच सोसावं लागतं

एक दिवस मरण्यासाठी या देहाला

आयुष्यभर पोसावं लागतं

कधी साऱ्यांची मनं राखत, तर 

कधी स्वत:चंच मन मारत जगावं लागतं

थोड्या सुखासाठी या जीवाला 

मरणाच्या दारातही बघावं लागतं

नात्याच्या जाळ्यातही कधी

स्वत:लाच गुरफटुन घ्यावं लागतं

जगताना मात्र इथं आपलं 

अस्तित्वही विसरावं लागतं

कधी वेळेचे गुलाम होऊन

स्वत:च्याच जीवाशी खेळावं लागतं

आहे असं हे जीवन संघर्षाचं

इथं जगण्यासाठी आयुष्यही जाळावं लागतं