दर्शन

पावसाच्या सरीमधून शीळ आली

 ढगाआडून हसली मूर्त सावळी 

लख लख वीज चमकत राहिली

मागे विद्युलता मुक्ताई दिसली

झरझर धारा कोसळत्या धरेवर

वारकरी दिंड्या दिसल्या वाटेवर

हिरवीकंचं तुळस झोकात डोईवर

भक्त धाव घेई चंद्रभागे तिरावर

शिवारी बळीराजा उभा पाण्यात 

तरारती भात रोपं लावे चिखलात

मोत्याची नक्षी टपोरी पानापानात

सूळसूळ मासोळ्याही ओहोळात

घरट्यात चिडीचूप्प बसती पक्षी

मोर सुखाने जलधारात नाचती

 रानात डरावं डरावंची वाढते गती

इंद्रधनुच्या दर्शनाने नेत्र सुखावती

ओल्यादिसात लेकीस धाडू सांगावा

श्रावणझुला आता झाडाला टांगावा

बहीण भावाच्या भेटीचा योग यावा

रोजचा गोड नेवेद्याचा बेत करावा

रानावनात वाऱ्याचं नर्तन चाले

डोंगरानी झऱ्याचे घुंगरू बांधले

विहरी तळ्यात जल सुखं साचले

धरतीचे चित्र छान रंगीत झाले