बाजार

बाजार भावनांचा रस्त्यात मांडलेला

आकांत आसवांचा डोळ्यात साठलेला

खेळात वासनेच्या देहास वाटते मी

पोटात भाकरीचा आक्रोश वाढलेला

आधार जीवनाचा शोधू कुठे कळेना

आभाळ फाटलेले अंधार दाटलेला

तू सांग भाव आता जो तो मला विचारी

व्यापार माणसांचा स्वस्तात चाललेला

प्रेमात वेड लागे काही उजागरांना

संसार बायकोशी अर्ध्यात फाटलेला

मोठा रुबाब आहे श्रीमंत माणसांचा

प्रेमांध वासनांनी सर्वांग  पेटलेला

प्रेमास कोणते देऊ नाव आज खोटे

‘लैला’ म्हणून बोले प्रत्येक भेटलेला