आजी आजोबा

आजी आजोबा गेल्यापासून

उखळ-मुसळ दिसत नाही

जातं शोधायला गेले

तेही सापडत नाही ॥1॥

बंब आणी घंगाळ

अंघोळीला नाही

काठवटील्या भाकरीला

चुलच पेटत नाही॥2॥

धान्य पाखडायला गेले

सूपच सापडत नाही

पाट्यावरचा वरवंटा

झेपतच नाही॥3॥

खूप बोलावसं वाटल तरी

ऐकायला कुणीच नाही

आठवणीतला मामचा गाव

स्वप्नातसुद्धा येत नाही॥4॥

सुखदुःखाच्या आठवणींनी

अंतःकरण होतं जड

उन्मळून पडलाय हो

आमचा आधारवड॥5॥