ಹಸಿರಿದ್ದರೆ ಉಸಿರು

ಉರಿಬಿಸಿಲು ಕಂಡು ಹಿಡಿ ಶಾಪವಿಟ್ಟೇವು

ಉಸಿರಾಡುವ ಗಾಳಿಗೆ ಸಂಚಕಾರ ತಂದೇವು

ನೆರಳು ಕೊಡುವ ಮರದ ಕೊರಳನ್ನ ಕತ್ತರಿಸಿದೆವು 

ನೆರಳಲ್ಲಿ ಕೂತು ನರಳಾಡುವ ಸ್ಥಿತಿಗೇ ಮುಟ್ಟಿದೆವು 

ನೆಡಲಿಲ್ಲ ನಾವೆಂದೂ ಒಂದೂ ಮರವನ್ನು

ಮರೆತಿಲ್ಲ ಮರದ ನೆರಳಿಗೆ ನಿಲ್ಲುವದನ್ನು

ತಪ್ಪಿಸಿಲ್ಲ ಕೊಡಲಿಯ ಏಟನ್ನೆಂದೂ ನಾವು

ಕಡಿದದ್ದು ಮರವಲ್ಲ ನಮ್ಮ ಬದುಕನ್ನೇ ನಾವು

ಇನ್ನೂ ಅರಿತಿಲ್ಲ ವಿನಾಶದ ಅಂಚಿನಲ್ಲಿರುವುದನ್ನು

ಅಟ್ಟಹಾಸದಲ್ಲಿ ಕೆಡವಿ ಕಟ್ಟುತಿರುವೆವು ಮನೆಯನ್ನು

ಸುಂದರ ವಿನ್ಯಾಸದ ಬಹುಮಹಡಿ ಕಟ್ಟಡಗಳನ್ನು

ಹೀಗೆ ಸಾಗಿದರೆ ಉಳಿಯುವುದೇ ಪ್ರಕೃತಿ ನಮಗಿನ್ನು 

ಮಾನವನ ಕ್ರೂರತ್ವಕ್ಕೆ ಕೊನೆಯಿಲ್ಲವಲ್ಲ ಇಲ್ಲಿಂದು 

ಬರಿದು ಮಾಡುತ್ತಿರುವುದು ಹೆತ್ತೊಡಲನ್ನು ಇಂದು 

ಮರೆಯದಿರಿ ಮಣ್ಣಲ್ಲಿ ಮಣ್ಣಾಗುವ ಮುನ್ನವಿಂದು

ಉಳಿಸಿ ಬೆಳೆಸಬೇಕು ನಾವು ನಿತ್ಯವು ಹಸಿರನ್ನಿಂದು